Kolkata, Lber:
Katkum ka khubor ba la ioh lum ka iathuh ba u kapten jong ka kynhun ialehkai IPL ka Kolkata Knight Riders (KKRs) u Shreyas Iyer u lah weng noh ialade mynta na ka ban iadonbyntalang bad ka kynhun baroh kawei ha ka lympung Indian Premier League jong une u snem ba mynta bad kumjuh ruh ha ka World Test Championship Final.
Kumba ka paw mynta ka daw ba pynlong ia une u rangialehkai ban yn ioh iashimbynta ha kitei artylli ki lympung ka long ba u Iyer u hap ban leit shah sumar bad shah puid ka met. Kumta dei halor kane ka bynta kaba lah pynlong ba un hap ban iehnoh shuwa ia ka kam ialehkai na ka bynta ki katto katne bnai.
Shuh shuh ruh kum u rangialehkai ba paw ka India, u Iyer u lah shah jied ruh ha ka kynhun ialehkai ODIs ka ri na ka bynta ki lai jingialehkai pyrshah ia ka Australia, hynrei uba lah hap ban weng noh ialade ha shuwa ka jingsdang ka jing-iaid lynti ka kynhun ha ka lympung.
Kumta na ka liang jong ka kynhun ialehkai Kriket ka ri ka iohi bad shem ruh mynta ia u Suryakumar kum u nongialehkai ba biang tam eh na ka bynta ban mih bujli ha ka jaka jong u Shreyas Iyer ha ka jaka ba saw ha ka kynhun ialehkai; watla u Surya um pat shym la lah ban pynkylla dur ia ka rukom ialehkai T20Is ka jong u ha ka jingialehkai ODIs, hynrei u iaisah kum u kyrtong bahakhmat eh mynta na ka bynta ban shimti ia ka kam u Iyer ha ryngkat bad ka jingialehkai ODI World Cup kaba u don ha ka jingmut jingpyrkhat ka jong u.
Da ka jingbym shym la lah u Iyer ban iadonlang bad ka kynhun ialehkai IPL ka Kolkata Knight Riders ka khubor ka iathuh ba katei ka kynhun ka donkam mynta ban wad briew na ka bynta ban pynkhamti pat ia ka kam kapten jong u Iyer ha ka kynhun bad u Andre Russell u lah ban long u kyrtong bahakhmat mynta na ka bynta ban shimti ia ka kam. Na ka bynta ka lympung ialehkai World Test Championship Final ha kaba u Iyer un ym lah ban iadonlang bad ka kynhun ialehkai ka ri, ka khubor ka iathuh ba mynta ka lah plie ka lad ia u Sarfaraz Khan ban mih madan ha ka lympung hadien ba u lah shah kyntait noh ha ka kynhun ialehkai Test ka ri ha ki katto katne por ba lah leit noh.
