Lausanne, Lber:
Na ka liang jong ka International Olympic Committee(IOC) ka pynbna khubor halor ka jingbthah ka jong ka ia ka synjuk pyniaid jingialehkai Olympic ka ri India ka IOA (Indian Olympic Association) na ka bynta ba kan pyntyllun noh kham kloi ia ka kam ha kaba iadei bad ka jingthung briew ha ka kyrdan CEO (Chief Executive Officer) khlem da pynslem shuh bad ka IOC ka lah pynthikna ruh ba ka jingialang kaba heh tam jong ka IOC kaba 140 kan sa long ha Mumbai ha u bnai Risaw mynta u snem.
Shuh shuh ruh ka IOC ka lah ithuh bad pdiang ruh ia u soh uba lah mih na ka Ilekshon jong ka IOA ha ka por ba katei ka synjuk ka pynlong ia ka jingialang jong baroh ki nongkitkam ki jong ka. Kumta ka Executive Board ka lah shim ruh ia ki lad ki lynti jong ka nangne shakhmat sha ka rai ba khatduh ha ka 6 tarik u Nohprah 2022 bad ha kaba ka Ilekshon jong ka NOC ka lah long kaba seisoh bad ha kaba lah ioh ruh ban jied ia u nongialam ba thymmai uba hakhliehduh ka synjuk.
Kumjuh ruh ka IOC da ka lynti kaba khuid ka lah pdiang ruh ia ki soh kiba lah mih na ka Ilekshon bad kaba lah pynthikna ruh ba ka jingialang kaba heh jong ka IOC jong une u snem ba myunta kan long beit ha Mumbai. Hynrei kumba ka paw mynta ka long ba ka NOC kam pat shym la thung ia u briew na ka bynta ka kyrdan CEO/Secretary General ka ban long katkum ka riti treikam jong ka NOC.
Kumta na ka liang jong ka shnat treikam bahakhmat jong ka IOC ha kajuh ka por ruh ka lah kyrpad ia ka NOC jong ka ri India ba kan pynthikna bad pynskhem noh ha ka jingpyntyllun ia ka rukom treikam ka jong ka khlem da pynslem shuh khnang ba kiei kiei baroh kin long kiba iaid beit iaid ryntih.
Kumta ruh ka shnat treikam ba thymmai jong ka IOA ka la lah ha ka ban pyntyllun ia ki kam ki jam jong ka naduh u bnai Nohprah 2022 ka 10 tarik, hynrei haduh mynta ym pat shym la lah ban thung pat ia u briew na ka bynta ka kyrdan CEO.
Kum ban shu pynpaw hangne ka long ba u Joint Secy ka IOA bad u nongialam bahakhliehduh ka All India Football Federation (AIFF) u Kalyan Chaubey u lah shah weng noh na ka kam shakri ka jong u kum u CEO. Ha kajuh ka por ruh jingialang kaba heh jong ka IOC kaba dei ka bynta ba 140 ka ban sa long ha katei ka jylla jong ka r ikan long ha Jio World Centre kata ha ki lai sngi kynthih jong u bnai Risaw bad ka ban sdang naduh ka 15-17 tarik.
