Glasgow, Lber:
Ka khubor ba lah ioh lum ka iathuh ba u nongialam bahakhmat jong ka kynhun ialehkai phutbol ka Scotland u Steve Clarke, u lah ioh ia ka lad na ka bynta ban nang iai pynjlan shuh shuh ka jingiateh kontrak ka jong u bad katei ka kynhun ialehkai haduh ban da wan biang ka lympung ialehkai World Cup kata ha u snem 2026.
Katei ka jingioh ka jong u ban nang iai pynjrong shuh shuh ia ka jingiateh bad ka kynhun ka pynlong ruh ia u kum u shipai ba jlan tam ha ka kam shakri ka jong u kum u nongialam lah palat 20 snem. Kum ban shu pynpaw biang hangne ka long ba u Clarke u lah ialam ia ka kynhun baroh kawei shaduh ka lympung iakhun Euro 2020 na ka bynta ban khur ia ka trophy jingjop kaba nyngkong eh ba ka kynhun kan khur naduh ka World Cup 1998.
Hadien ka jingshah rem noh ka kynhun ha ka Ukraine ha ka jingiakhun Play-offs jong ka lympung ialehkai World Cup 2022, katei ka kynhun ka lah rah ia ka nam jop ha ka Nations League Group na ka bynta ban jam pat sha ka kyrdan ba kham shajrong ha ka sien kaba nyngkong. Dei naduh u snem 2002 ba u Clarke u lah ioh ban shimti ia ka kam bad shah pynskhem ruh kum u nongpyniaid ba jlan tam ha ka kynhun naduh ba u Craig Brown u lah iehnoh ia ka kam ha utei ujuh u snem.
Ka group ha kaba ka Scotland ka lah shah pyniakab na ka bynta ka jingiaknieh rung sha kaEuropean Championship 2024 ka kynthup ia ka kynhun ialehkai ka Norway bad Georgia bad ki ar kynhun ialehkai kin ioh ban rung sha katei ka lympung iakhun ka ban long ha Germany bad ka Scotland ruh ka lah thikna ia ka jingiaid shakhmat jong ka kaba ar lyngba ka Play-offs namar ka long ka nongjop napdeng ki kynhun ialehkai ha ka group ha ka Nations League.
