Los Angeles:
U tyngshop ka Hollywood u Orlando Bloom u la leit ban iakynduh ia u President ka Ukraine u Volodymyr Zelensky ha ka jingleit iuhkjat jong u sha Ukraine ha kaba u Orlando ha kane ka jing leit ba kyrpang u la leit ruh sha Kyiv ban iakynduh markhmat bad u Volodymyr Zelensky.
Kane ka jingleit u Orlando sha Ukraine ka dei ruh kum shi bynta jong ka jingleit ba kyrpang jong u kum u Goodwill Ambassador ka United Nations’ children’s organisation UNICEF.
U Orlando uba la ak ha ka ‘Pirates of the Caribbean’ ha ka jingleit jong u sha Ukraine ula ioh ruh ban iuhkjat ha ki 3 tylli ki shnong kiba kynthup ka Kyiv, Irpin bad Demydiv bad kane ka jingleit ka dei ruh kaba haduh 3 sngi.
Kum u Goodwill Am bassador ka UNICEF u Orlando ula iohlad ruh ban iakynduh bad ki khynnah samla jong kane ka ri ban iakren halor shibun kiei kiei kiba long donkam.
Ha ka jingiakynduh markhmat u Orlando bad u Zelensky une u tyngshop ula ai jingiaroh bha ia une u nongialam uba ym shim la duh jingkyrmen wat hadien jong ka thma kaba jur kaba la khie ha kane ka ri bad kumjuh ruh ka jingshah pynjulor bad ka jingduhnoh jong kiba bun ki mynsiem briew.
U Orlando ula ban jur ruh halor kumno ba dei ban ai jingiarap ia ki khyllung khynnah kiba don ha kane ka ri kiba la mad jingeh bad ka jingbym ioh ia ka bam ka dih kaba biang naduh ba wan khie kane ka thma bad kwah ruh ba ki khyllung khynnah kin ioh biang ban im kajuh ka jingim kumba long kiwei kiwei ki khynnah jong ki ri ka pyrthei.
Shuh shuh la iathuh ba ha kane ka jingleit u Orlando sha ka shnong Irpin ula iohlad ruh ban leit rung sha ki skul kiba don bad ioh iakren ruh bad ki katto katne ki khynnah pule jong ki skul bapher bapher.
