U Sumar Sing Sawian
Ha kane ka kynti ne sien kaba mynta, ngin ia peit bad ia jngoh ia u dak Phareng H. Te ngin iaphai shwa ia ka kyntien HERITAGE, kaba mut kaei kaei kaba hiar ne ioh pateng, khamtam ia kiei kiei kiba kordor bad shongdor.
Kiei kiei kiba na ka kur ka jaid, ne ki jingtei pynsah nam sah kyrteng kum ki Mawbynna, ki jingtei, kiba don kata ka lamdien (background) jong ka khanapateng (history), kiba ieng ban sakhi na kawei ka pateng sha kawei pat ka pateng. Namar kata ia ka kyntien HERITAGE, ngi lah ban ong ka NONGKYNTI, kaba dei ban pynneh ban pynsah ia ka nam ka burom ki longshuwa ki manshuwa.
Hangne ha Ri Hynñiewtrep, ngi don kum kine ki NONGKYNTI, kiba dei ban ïai kynmaw bad pynneh pynsah, khamtam kiba iadei bad ka Mei Ramew, ka Mei Mariang, ka Mei Ri lung, ka Mei Risan bad ka Mei Rilang, kum ki Khlaw ba kyntang. Ka la don ka jingpyrshah kaba jur ban tei ban shna ia ka Ing Dorbar Thaw Aiñ ka jylla Meghalaya, ha “Tara Ghar,” mar khap ka Nan Palok, ka daw ka long ba ia ka ïing “Tara Ghar,” la niewtang bad tip bad ithuh kum ka jingtei NONGKYNTI (Heritage building). Kumta ia kane ka jingthmu la hap ban pyndam.
Ia ka kyntien HISTORY la tip ha ka kyntien Khasi kum ka KHANAPATENG. Hynrei nalor ka Khanapateng ngi, don ki Parom ki Paju, ki puriskam ki purinam, ki Thohthaw ki Thohwet, bad ruh ki jing-iathuh KHANAPARA.
Mynta lada phai pat sha ka Ïing ne Dorbar Thaw Aiñ, ki don shibun ki bakhraw, ki basan, ki myntri. Hapoh ka Dorbar Thaw Aiñ ka jylla ngi don ia Ka Myntri Korbar Ri, kaba Ka Kong Roshon Warjri, ha kaba ka kyntien Phareng ki ong HOME MINISTER. Ka long kaba bakla shibun ban ong ba ka Kong Roshon Warjri ka dei ka myntri Kam Poh Ïing.
Namar ba ka kyntien KORBAR RI, ka da dei ka kyntien kaba kham khia bad kit jingmut ia kaba pyndonkam ha ka synshar ka khadar jong ki Dorbar Hima tynrai jong ka Ri Hynñiewtrep. Ka Myntri Kobar Ri ka Korbar ia ka ri bad jylla baroh kawei ym tang ki kam poh ïing.
Ha kane ka Ri Hynñiewtrep, ki don bun ki sap ki phong jong ki shnong ki thaw, kiba don ia ki sap ki phong tynrai, ban thaiñ jaiñ, ban thaiñ da ki siej, ki shken, ki tlieng, ia ki jingdonkam ha ïing ha sem, kum ki shylliah, ki mula shuki, ki jingbuh jingsat, ia kaba ha ka kyntien Phareng ki ong ka HANDICRAFT. Katba ia ka kyntien HANDICRAFT ha ka kyntien Khasi ngi ong ka THAW KA WET.
Phi ju ia peit bad mut dur ma – ai, ia kaei kaba don sha lyndet jong ka jingiakynduh ka khyndew bad ka sahit bneng. Ha ka kyntien Phareng ki ong ka HORIZON.Katba ha ka kyntien Khasi ngi ong ka DONGDIT lane ka SAWRIANG.
Ban pynkut ki don iwei ar ki kyntien ban ia pyrkhat ia puson. Ha ka kyntien Phareng, ki ong ba ia kaei kaei kaba lymbiang ka dei kata ka HALF -BAKED. Katba ha ka kyntien Khasi ngi ong JA KHAW OT. Shish kum kato ka rai JA KHAW OT, ban ia bam ruh ioh suh sa ka kpoh.
