Albania, Lber:
U nongialehkai iakob rah-nar ka ri India u Bharali Bedabrate mynta ka kynti u la lah ban khur noh shalade ia ka takma Rnong na ka jingiakob rah-nar ki shynrang ha ka 67kg ha ka lympung ialehkai kaba long mynta ha Durres ka IWF World Youth Championships.
Kumta utei u rangialehkai ba dang ha ka rt aba 15 snem, ha ka jingkhein kyllum ia ka jinglah jong u ban rah nar ha ka jingkhia ba 267kg (119kg+148kg), u lah wan ha ka kyrdan balai na ka tei ka lympung ialehkai kaba u lah shimbynta. Shuh shuh ruh napdeng kiwei pat ki rangialehkai, u Seryozha Barseghyanna Armenia da 275kg(128kg+147kg) bad u nongialehkai na Saudi Arabia u Mohammed Al Marzouq da 270kg (119kg+148kg) ki long kiba lah khur noh shalade ia ka kyrdan ba nyngkong bad ba-ar ha ryngkat bad ka takma Ksiar bad Rupa. Shuh shuh ruh ka khubor ka iathuh ba u Bharali u lah khur ruh ia ka takma Rnong na ka jingiakob rah-nar ha ka kyrdan Clean & Jerk; ha kaba u la lah ban rah haduh ka jingkhia kaba 148kg. Ia ki takma bapher bapher lah ainam lakajong na ka bynta ki nongialehkai ha ka Snatch, Clean & Jerk bad ka jingkhein kyllumlang ha ka jingrah nar ha ka Continental bad World Championships. Na ka jingiakob ki kynthei ha ka 49kg, ka Koyel Bar ka lah wan ha ka kyrdan ba 9 ha ka jingkhein kyllumlang ia ka jinglah jong ka ban rah-nar ha ka 144kg (64kg+80kg). katba ka Mina Santa kaba la lah ban rah 153kg (70kg+83kg) ka lah wan ha ka kyrdan ba 13 na ka jingkob rah-nar ki kynthei ha ka 55kg.
