Kolkata, Lber:
Ka Myntri Rangbah jong ka West Bengal ka Mamata Banerjee ha ka sngi Balang ka la kyntu ïa baroh ki seng saiñ pyrthei ha ka ri ba kin ïatylli na ka bynta ban ïakhun pyrshah ïa ka seng BJP ha ka ilekshon Lok Sabha ka ban sa long ha u snem ban wan.
Haba ïakren halor ka ilekshon Parliamentary 2024 ka ban long ka jingïakhun hapdeng ki nongshong shnong jong ka ri bad ka seng BJP, ka Banerjee ka la ong ba ki briew jong baroh ki jait niam kiba kynthup ïa ki Hindu, Muslim, Sikh, Christian, Parsi – ki la dei ban ïatylli na ka bynta ban ïakhun pyrshah ïa ka seng BJP na ka bynta ban ïada ïa ka synshar paidbah ha India.
Ka heh nongïalam jong ka seng Trinamool Congress, kaba la sdang ïa ka jingïakhih kaba ar sngi pyrshah ïa ka sorkar kmie halor ka jingleh bymhok pyrshah ïa ka jylla, ka la ong ba ka seng BJP ka long kum u ‘Dushasana’ ha kaba ka la kyntiew ïa ka ri da ka jingdie ïa ka LIC bad ka SBI.
“Baroh ki seng saiñ pyrthei ha India ki la dei ban ïeng tylli na ka bynta ban kyndang noh ïa ka sorkar BJP. Weng noh ïa u ‘Dushasana’ BJP bad ïada ïa ki paidbah jong ka ri bad ïa ka synshar paidbah,” ka la ong.
