Guwahati, Lber:
Arngut ki lehnoh ki la lait phet na patok ha Arunachal Pradesh da kaba pynïap ïa u nongap pahara uba dang don ha ka kam. Kine kiba la lait phet ki dei kiba la tip kyrteng kum u Roksen Homcha Lowang na Changlang distrik bad u Tiptu Kitnya na ka distrik ba marjan na Tirap distrik kine ki dei na ka kynhun lehnoh Niki Sumi faction of National Socialist Council of Nagaland (Khaplang)/NSCN (K).
U Lowang u la shong patok ha ki san snem ba la leit ha kaba ïadei bad ka jingjia pynïap briew katba u Kitnya u dang shah bishar bniah haduh mynta bad u dang don ha patok, bad u la shah set ha Khonsa Jail ha Tirap na ka bynta ki ar snem ba la leit. U nongaiktien jong ka tnat pulit u Rohit Rajbir Singh ha ka jingïakren bad ki nongthoh khubor u la ong ba kine baroh arngut ki la knie ïa ka suloi jong u pulit langrut u Wangnyam Bosai bad siat ïa u najan eh hashwa ba kin phet da kaba suk. U Bosai, uba la mysnaw jur ha ka jingshah thombor u la khlad noh ha ka lynti ban kit sha ka jaka ai jingsumar.
