Gandhinagar, Lber:
Ka Sessions Court Mehsana distrik kaba don ha Gujarat ha ka sngi Balang ka la buh noh sharud ïa ka hukum jong ka ïingbishar kaba kham hapoh ha kaba ïadei bad ka jingrai pynrem ïa u MLA jong ka seng Congress u Jignesh Mevani bad ïa ki khyndai ngut kiwei pat ba kin shah set patok lai bnai ha kaba ïadei bad ka jingjia kaba la jia ha u snem 2017 naba ki la pynlong ïa ka jingïalang paidbah khlem ka jingïoh jingbit na ki pulit.
Kum ka jingpdiang ba baroh ka la long ka bym don nongrim bad ym shym don ruh ki sabut ki ban kyrshan halor ka jingpynrem halor kiba shah kynnoh, u Additional Sessions Judge CM Pawar u la ailad ïa ka jingkyrpad jong u Mevani, ka nongïalam jong ka seng Aam Aadmi Party (AAP) ka Reshma Patel, bad kiwei pat pyrshah ïa ka hukum ha u Jymmang jong u snem 2022 ba la ai da ka Judicial Magistrate Court kaba la pynngat ïa ki halor ka jingkynnoh ba ki la leh ïa kaba bakla hapoh ki kyndon 143 jong ka Indian Penal Code (IPC).
Hadien ba la dep ban rai pynrem, ka ïingbishar jong u Magistrate ka la rai pynshitom ïa ki ban set lai bnai ha patok. Kane ka jingjia ka la paw pyrthei ha u Naitung jong u snem 2017 haba ka la don ka jingujor ejahar kaba la long pyrshah ïa u nongïakhun ban pynïoh ïa ka hok jong ki Dalit u Mevani bad kiwei pat ha Mehsana ‘A’ Division Police Station namar ka jingpynlong ïa ka “Azadi March” na Mehsana sha Dhanera ha Banaskantha distrik khlem ka jingïoh jingbit na ki pulit.
Ïa ka jingïalang paidbah la pynlong kum shi bynta ban kyrshan halor ki hok na ka bynta ki nongrep jong ka thaiñ. Kine kiba la shah kynnoh ki la dep ban pan jingbit na ki heh ba dei khmih na ka bynta ban pynlong ïa ka jingïalang paidbah hapoh ka lama jong ka Rashtriya Dalit Adhikar Manch ban pynpaw paidbah halor ki mat jingdawa jong ki kynhun Dalit.
Ïa ka jingai jingbit naka bynta kane ka jingïalang ha kaba nyngkong la ai da u Executive Magistrate katkum ka hukum kaba la long ha ka 27 tarik, Jylliew, 2017, bad hadien kane la rai ban pynkynriah noh sha ka 7 tarik, Naitung namar ki daw bym lah kiar.
Wat la katta ruh, kine ki nongpynïaid ki la rai ban ïaid beit shakhamat ha kaba ïadei bad ka jingthmu ban pynlong ïa ka jingïalang paidbah bad ki la shah pynngat ha ki pulit hapoh ka kyndon IPC section 143. Ha katei ka por u Mevani u la long u MLA shimet na Vadgam ha Banaskantha distrik.
