Shillong, Lber 30:
Ka kynhun ïalehkai ka Jylla ka la jam sha ka semi final ha ka 1st North East Inter State Friendship Tournament kaba la long ha Nagaland. Kane ka wan urlong hadien ba ka Manipur ka la lah ban pynliem noh ïa ka Arunachal Pradesh da 133 run ha ka sngi Palei.
Hynnin ka sngi ka Meghalaya ka la lah ban pynliem ïa ka Arunachal da 8 wiket ha ka Group-A. Hynrei lyngba ka jingjop ka Manipur, ka jingïaid lynti ka Arunachal ha kane ka lympung ka la poi sha kaba kut.
Kumta ka final hapdeng ka Manipur bad ka Meghalaya kan long ha ka sngi Thohdieng na ka bynta ban ïaknieh ban bat ïa ka kyrdan ba hakhlieh ha kane ka group.
Hadien ba ka la jop ïa kynting pisa ha Nagaland Cricket Stadium, ka Manipur ka la kam trai shwa ban tied nyngkong bad ka la lah ban tied 253 run. U Bikash Singh u long u nongtied uba ïoh bun da kaba kamai 74 run ha ryngkat u Md Sultan Karim uba ïoh 53 run.
U Abo Nabam, Yab Niya, Darge Bagra bad u Techi Doria ki la khur mar ar wiket na ka bynta ka Arunachal ha kaba ka la pynlong ïa ki nongtied ka Manipur ban shah pynkhyllem lut baroh ha ki 49.3 over.
Haba wan beh ïa ka thong, ka Arunachal ka la pyrshang ban ïakhun tyngeh ha kaba u Techi Doria u la tied 31 bad u Neelam Obi u la ïoh 26 run. Hynrei na ka daw ka jingtbit ki nongkawang bol ka Manipur ka la pynlong ïa ki nongtied ka Arunachal ban shah pynkhyllem 10 wiket bad kamai 120 run ha ki 44 over. U Kishan Laishram u la ïoh ban khur 3 wiket, katba ïa ki ar wiket la khur da u Rajkumar Rex, Bishworjit bad u Md Sultan Karim na ka bynta ban pynlong ïa ka Manipur ban khur ïa ka jingjop.
Haba phai sha kawei pat ka jingïakhun kaba la long ha Sovima Cricket Ground, ka Mizoram kaba la jop ïa ka kynting pisa, ka la ailad shwa ïa ka Sikkim ba kan tied nyngkong ha kaba ka la kamai 136 run. Ki ar ngut ki nongkawang bol kata u Rinsangzela bad u Remruatdika Ralte ki la khur 5 wiket. Katba ki nongtied ka Sikkim kiba la lah ban kamai run ki kynthup ïa u Palzor Tamang (36), Lee Yong Lepcha (25) bad u Jeetendra Sharma (17) na ka bynta ban pynlong ïa kane ka kynhun ban kamai 136 run bad shah pynkhyllem baroh ki nongtied ha ki 38 over.
Haba wan shimti ïa ka pali kaba ar, Ki nongtied ka Mizoram ki la shah pynkhyllem lut baroh na ka bynta kamai tang 88 run bad ban pynlong ïa ka Sikkim ban khur ïa ka jingjop da 48 run.
Kane la wan lyngba ka jingïalehkai bha u Ankur Malik bad u Palzor Tamang kiba la lah ban khur 5 bad 3 wiket. Katba u Zothanzuala (23) bad u Joseph Lalthankhuma (21) ki la long ki ar ngut ki nongtied ka Mizoram kiba la lah ban ïalehkai bha.
Ha kawei pat ka liang u President ka Meghalaya Cricket Association bad uba long u Convenor ka NECDC u Naba Bhattacharjee, u la pyllait ïa ki trophy jong kane ka lympung hynne ka sngi ha Dimapur ha ryngkat ka jingïadon lang u Secretary ka Nagaland Cricket Association.
