Shillong, Lber 30:
Ka Tura District Cricket Association ka la jam sha ka final ha ka lympung ïalehkai U-15 Inter District Cricket Tournament 2023 ba la pynïaid da ka Meghalaya Cricket Association hadien ba ka lah pynliem ïa ka West Jaiñtia Hills DCA da 35 run ha ka sngi Palei ha madan Umbuda, Ri-Bhoi.
Hynnin ka sngi ha ka inning kaba nyngkong, ka Tura ka la lah ban kamai 125 run bad shah pynkhyllem 10 wiket ha kaba ka la shah tam da 27 run ha ka WJH, kaba la kamai 152. Hynrei haba bteng ïa ka pali ban tied ïa ka inning kaba ar ka la kynjoh 24/0 ha ka inning kaba ar, ha kaba ka Tura ka la lah ban kamai 179 run bad shah pynkhyllem baroh ki nongtied. Kumta ka WJH ka la donkam ban kamai 153 na ka bynta ban khur ïa ka jingjop, hynrei ka la shah pynkhyllem baroh ki nongtied na ka bynta ban kamai 117 run.
Ki nongtied kiba la lah ban ïalehkai bha na ka bynta ka Tura ha ka inning kaba ar ki long u Aritra Paul (37) bad u Agatchu Chetai K. Marak (39) kiba la lah ban kynjoh 75 run na ka bynta ka wiket kaba nyngkong. Hadien la bud sa u Ben Haden N. Marak (40) bad u Trijal Agarwal (36) kiba la lah ban kynjoh 64 run na ka bynta ka wiket kaba lai na ka bynta ban pynlong ïa ka Tura ban kamai 150 run.
Ki nongkawang bol ka WJH kiba la lah ban pynhap ïa ki phra wiket ïa ki nongtied ka Tura ki long u Namewanki Pakynteiñ (4/49) ha kaba ka la pynlong ïa u ban khur 9 wiket ha ka inning kaba ar bad u Maremdorkini Sutnga (3/23) bad u Eshan Siangshai 2/20.
Ka WJH kam shym la lah ban kynjoh sha ka thong bad kane ka dei na ka daw ka jingbym lah ban ïalehkai bha ki nongtied ha kaba u Sutnga, uba la tied bun u la ïoh tang 26 run bad u Pakynteiñ u la ïoh 21 run.
Na ka bynta ka Tura, baroh ki saw ngut ki nongkawang bol ki la lah ban ïalehkai bha na ka bynta ban pynhap wiket ïa ki nongtied ka liang pyrshah. Kine ki kynthup ïa u Manthan Gupta (3/19) bad u Kein Hagio R. Marak (3/42), Jamesbirth Ch Sangma (2/13) bad u Ben Haden (2/17). U Gupta, uba la khur 5 wiket ha ka inning kaba nyngkong, u la lah ban kynjoh sha ki 8/55 bad u la ïohpdiang ruh ïa ka nam Player of the Match.
Lyngba kane ka jingjop, ka Tura kan pynkhreh ban ïaknieh ïa ka nam lahduh pyrshah ïa ka Shillong Cricket Association-A ha ka jingïakhun final ka ban long ha ka 3 tarik u Ïaïong.
