Raphael Warjri
Ka jingiakhing jong ki arngut ki radbah na Khasi bad Garo na kajuh ka seng saiñpyrthei,kata u Bah Pynshngaiñ N Syiem bad u Dr Mukul Sangma, ka la lam shaduh u pud ba la seng ia ka PDF hapoh ka jingialam jong u Bah P N Syiem, hynrei khala khala u la shah pynhiar khet bad sakma ia lade katba kham hadien na ka liang u Dr Mukul Sangma la rong bikar ia ki nongmihkhmat na ka seng Congress bad iasnoh bad ka TMC ka ba khlem lah shuh ban khiekhlieh bad la ia khyllem lang bad ka seng Congress, kum ban pun lynti ia ka seng NPP ba kan ieng rasong. Ki seng HSPDP, PDIC, HNF, PDM, KHNAM, PDF ki la mih da ka ba sngur mynsiem ban shakri ia la ki khun ki hajar ha Ri Khasi, hynrei baroh kine ki seng ki la shu jyllei bad kie berong sha ki latlat jong ka klet jyndam ba ym don ba kwah kynmaw shuh; jar la katta sa tang ka HSPDP bad PDM kiba dang sdien ha thmit jong kata ka latlat ka ba phyllung bad tuid kynjai hateng hateng la kum ba la shylluit biang sa kawei ka seng kaba kyndeh kum ka VPP.
Hadien ba la iamrem u Bah Ardent M Basaiawmoit ha ki aïom synshar ba la leit noh, u la khihwin jar jar ban lum ia ki akhia bad khun binong bishon jong ka jaitbynriew naduh ki kynrem lyndan haduh ki rangli juki kiba thrang da ka dohnud ba shida ban saitkhuid ia ka bamsap bampong naduh kliar haduh tbian jong ka imlang sahlang. Ha kata ka nongrim ki la ieng skhem ban iakhun pyrshah ia ka bor jong ka spah bymhok bad ka pisa iohei, da kaba hikai ia la ki kyrtong ban kyndiah na kaba pah da ka pisa bad ban khlei da ka juban ba shida na ka bynta ban tei ia ka longbriew manbriew ha ka pyrkhat pyrdaiñ khnang ban wanlam ia ka saiñkylla saiñkhieim (re-volution / renaissance) bad da kata hi ka juban ban tei ia ki khun ki hajar bad kyntiew ia ka imlang sahlang ha jylla. Ka long shisha kaba shongkun kata ka saiñpyrkhat, hynrei ban phrung ha ka jabieng bad janor jong ki paidbah ka long ka kynpeiñ (challenge) kaba dang dei ban mad jai-pa-jai haduh kat ban poi sha ka thong. Kumta ka dawa shikatdei ka mynsiem iaishah bad ka dohnud ba palei ban shohnud (sensitise) ia ka imlang sahlang ban tyngkan na kaba lynsher da ki nia jali jaum bad ki padiah khlem baiwai.
Naduh u Bah Hoping Stone Lyngdoh, Bah G G Swell, Bah H S Shylla, Bah Sounder Strong Cajee, haduh u Bah Paul Lyngdoh, Bah Pynshngaiñ N Syiem, Bah Ardent Basaiawmoit ki la mih shaphrang ban iasaid na ka bynta ka bha ka miat jong ka jaitbynriew namar baroh kita ki rangbah bad samla ki long kiba shitrhem bad ki ba angnud shisha ban shakri ia la ka jiatbynriew bad ban kyntiew ia ka imlang sahlang ha jylla. Ym don ba shlan ban len ia ka mynsiem ieitri jong kita baroh kiba la ialam ia la ki juh ki paidbynriew lajong, hynrei la sakma ki paidbah salonsar ha la ki sem ki sem lajong ba khrat kita ki nongialam tang sha lade. Baroh kita ki seng ki long ki ba synjor bad khlem lah ban tehsong shityllup ia la ki paidbah shityllup ka Ri Khasi, bad lehse ka VPP dang shu tynjuh shwa. Ka por ka la dep sakhi ba ym myntoi ban shitrhem tang ha la ka sem ba synjor bad donkam shisha ban tehsong salonsar ia ki paid byllien ha kawei ka shlem ka ba shitylli tang kawei ka thong ka ba khlaiñ bor bad ba shynraiñ iktiar. Daei na kata ka daw ba ki paidbah ki shaniah ha ka bor jong ka spah ne ka pisa bad ki tieng khlemraiñ ia ki ba thombor, la tlot ka bor jong ka sur paidbah bad la iamrem ka long-rynñieng jong ki bynriew ha kane ka juk mynta.
Kawei na ki daw ba kyllum jong kita ki seng ki ba iai mih na ka por sha ka por ka long ba ki don kajuh ka rukom pyrkhat ban pynksan ia lade bad pynrem pyrshah ia kiwei pat halor ki juban ki ba shongnia. Naduh mynnyngkong ha ba pait pnat ka HSPDP haduh mynta ba pait pnat ka VPP ki nia ba pynksan ki dei kijuh ba ym biang shuh kiwei, seng noh da ka ba thymmai bad ynda la jngut sa kata phiah biang sa da kawei kaba kham biang; bad ynda la byrsieh sa kata sdang ban pharia kawei hadien kawei haduh ba ym lah ñiewtang shuh kano ka khuid suba bad kano ka sniew ka smeh, namar baroh kawei-pa-kawei ki long ki ba khun ranab ban shah liang bad pynksan tang ia lade bad da lei lei ym lah shuh ban mih da kaba nylla. Kumta ka daw bah ka long ban kdup jynsur mynsiem salonsar ha ryngkat ka ba teh lakam da ki kyndon ba pyrkhing ba ka thong ka long ban ieng rasong tang kawei ka seng riewlum ba shisha ka ba khlem khun ranab shuh sha ka pyrkhat shimet ne shikynhun bynriew. Lada long kaba lah la sngew dei ban pynkhyllem noh phar ia ki sengheh na dewbah India da ka sur paidbah ba khynwin ha satlak ka Ri Khasi, hynrei kum kata ruh donkam ban iaineh bad iaishah ha ka lyngngai jong ka ïa ka ban poi sha ka thong. Lehse da kata ka lynti, ka sur paidbah ba shisha kan ym sakma shuh ban shahshkor ia ki juban ba khlei shibyllien ki seng ki ba kam ban shakri hok ia ki paidbah, bad ka jingmih ba thikan ka long ba la pharia pynban ia la ki paidbah haduh ba suwan, bad iai wan synshar suk da ki seng ne ki bynriew ba ym ju khmih lynti lano lano.
