Jakarta, Lber:
Katkum ka khubor ba la ioh lum ka iathuh ba ki nongialehkai phutbol kiba na ka ri Indonesia, ki ‘riew paidbah kiba ju ieid bha ia katei ka jait jingialehkai ha katei ka ri bad kumjuh ruh ki nongai jingkren ha ki jing-ialehkai bapher bapher ki pynpaw mynta ia ka jingbitar bad ka jingsngewsih kaba khraw hadien ba ka synjuk pyniaid jingialehkai phutbol bahakhliehduh ha ka pyrthei ka FIFA ka la weng noh mynta ia ka lympung ialehkai U-20 World Cup na katei ka ri. Kane ka long shi taiew shuwa ban poi ka por ha ka ban plie pyrda noh ia katei ka lympung ialehkai hadien ka jingmih ka jingpyrshah na kiba bun ki paidbah nongshong shnong katei ka ri kiba lah pyrshah ia ka ri Israel ban shimbynta ha ka lympung.
Katei ka jingduh kaba khraw jong katei ka ri ha ka ban pynlong ia ka lympung ka lah wan urlong hadien ba arngut ki nongpyniaid bahalor ka ri ki lah khang pyrshah ia ka ri Israel ban shimbynta ha ka lympung, naba haduh mynta mynne ka Indonesia bad Israel kim shym la don satia ia kata ka jingiadei kaba jan ka jong ki katkum ki kyndon-ain bad ka jingkyrshan na ka bynta ka jingjia ia ki nongshnong shnong ka ri Palestine kaba long ka ri kaba bun tam eh ki nongshnong shnong kiba dei ki Muslim kaba la kiew bha, ka lah ai ding shuh shuh ia kiba pyrshah na ka bynta ban pdiang ia ka kynhun ialehkai ka Israel sha ka lympung.
Kumta katei ka rai jong ka FIFA ha ka ban weng noh ia ka lympung na ka tei ka ri bad ban wan ia ka ri ba thymmai ha ka ban pynlong ia ka lympung ka lah ktah shibun ia ka kynhun ialehkai katei ka ri kaba lah shu ioh rung beit kumto sha ka lympung khelm kano kano ka jingiakhun bad ruh kaba lah wanrah ia ka jingeh bakhraw sha ka ri bad ka ban mad sa kawei pat ka jingiakhun mynta.
Na ka liang jong u nongialam bahakhliehduh jong ka kynhun ialehkai ka Indonesia u Shin Tae Yong u iathuh ba u dap da ka jingpait-dohnud bad ka jingsngewthait sngew jlep shibun halor katei ka bynta hadien ba u lah dep ban pynkhreh ia ka kynhun ialehkai baroh kawei lah palat lai snem na ka bynta ban ioh shimbynta ha katei ka lympung ialehkai jong ki khynnah kiba hapoh ka rta ba 20 snem(U-20).
Shuh shuh ruh na ka liang jong u nongpyniaid bahakhliehduh katei ka ri u Joko Widodo u iathuh ba u dap da ka jingsngewsih kaba jur bad ka jingbym lah shuh ban poi pyrkhat ne ban ong eiei shuh halor katei ka rai jong ka FIFA, hynrei uba lah pynpaw pat ba ka ri baroh kawei ka dei ban burom ia kata. U Lat jong ka Bali u Wayan Koster u lah iasnohktilang ha ka jingpyrta shla pyrshah Israel.
Na ka liang jong ka Jakarta ka lah kular ia ka jingpynthikna ia ka jingshimbynta jong ka ri Israel watla ki lah don ki katto katne kiba iengskhem halor ka nongrim jingpyrshah ki jong ka ia katei ka ri kiba dei na ka ri Palestine. Ki nongpyniaid bahalor jong ka ri Indonesia, ki pynpaw ba ka jingduh noh jong ka ri ia ka tei ka lympung ialehkai ka wanrah ia ka jingduh kaba khraw ia ka ri baroh kawei kaba lah kot sha ki spah millions dollar.
Na ka liang jong ka FIFA ka lah iai byrngem-byrsit ruh nangne shakhmat ha kaba iadei bad ka jingpynshitom jong ka ia katei ka ri bad kaba lah ruh ban shah weng noh shi syndon na ka rynsan iaknieh rung sha ka World Cup 2026 ka ban sa long ha u bnai Risaw.
