Los Angeles:
Ka Zendaya kan sa shah pynkup burom da ka Star of the Year Award ha ka CinemaCon ha kaba kane ka jingshah pynkup burom jong ka Zendaya kan dei halor ka jingnoh synñiang sha ka kam ak phlim bad ka jingai mynsiem ia kiba bun ki samla kiba don sap ha kaba iadei bad kane.
Hadien jong u Dwayne Johnson bad Scarlett Johansson ka Zendaya kan sa shah pynkup bu rom da ka Star of the Year Award bad ka jingnoh synñiang bad jingtrei shitom jong ka Zendaya ha ki snem ba la leit ka long kaei kaei kaba la pynheh mynsiem shisha ia ka mynta.
Naduh u 2011 la sam ia kane ka khusnam bad kiwei kiwei kiba la ioh ban pdiang ia ka ki kynthup ruh u Chris Pratt, Emma Stone , Tom Holland bad kiwei kiwei.
Kawei na ki lad pathai khubor ka Hollywood ka iathuh ba ka Zendaya wat lada ka dang shu rung ak phlim shen pynban ka la lah ban khring ia kiba bun lyngba ki kam ba ka trei bad ka la noh synñiang shi katdei eh.
Kum ka puron ka Zendaya ka la ak ha ka Spider-Man: Far From Home, The Greatest Showman bad Dune bad ka la ak ruh kum ka Rocky Blue ha kawei na ki phlim jong ka Disney Channel ka Shake It Up (2010-2013).
