Aizawl, Lber:
Ki tnat pahara ha Mizoram ki la lap bad ioh kurup ia ki sikret nabar ri kiba shongdor palat Rs 3.5 klur.
Ka jinglap bad jingkurup ka la dei ha Champhai district jong ka Mizoram. Ia ka jingkurup ia une u mar la pyndep da ka jingiatreilang jong ki shipai jong ka Assam Rifles bad ki heh jong ka tnat custom jong ka Mizoram.
Kumba palat 235 tylli ki song jong ki sikret nabar ri kiba shongdor 3.525 klur la lap na ka shnong Zokhawthar ha ka Champhai district jong ka Mizoram. Ia ka jingkhynra la pynlong da ka jingiatrei lang jong ki shipai ka Assam Rifles bad customs preventive force, Champhai ha Mizoram.
Ia kine ki tiar kiba la ioh kurup la aiti sha ka customs preventive force, Champhai ha Mizoram na ka bynta ki jingtohkit shuh shuh na ka bynta ka jingkhaii beain. “Ka jingkhaii tuh ia ki tiar beain kaba iai don haduh mynta kadei ka mat kaba khia na ka bynta ka Mizoram,” la ong ka Assam Rifles ha ka jingthoh.
Ka khappud shabar ri jong ka Mizoram bad Myanmar kaba jngai 510 km bad ka bym ker, khamtam ha ki pud jong ka Champhai district, kadei ka jaka kaba bna bha na ka bynta ki jingkhaii tuh.
Nalor ki drok beaiñ kiba pher bapher, ki sikret nabar ri bad shibun kiwei pat ki mar kiba shalan tuh kum ka ksiar bad kumjuh ruh ia ki tiar siat bad tiar pynbthei, ki mrad kiba nabar bad ki areca nuts la khaii tuh barobor na Myanmar sha ki jylla shatei lam mihngi,khamtam sha Mizoram bad Manipur.
