Sumar Sing Sawian
Ka IDEOLOGY, ha ka ktien Phareng ka thew ia ka rukom ne lynti pyrkhat pyrdaiñ, bad ka jingngeit halor kane ka rukom pyrkhat, ia kaba ha ka kyntien Khasi, lah ban ong ba ka dei ka SNAP PYRKHAT. Ki don hateng hateng, ba donkam ka jingiakren,ia pyrkhat ne jingiaphylliew jingmut, tang hapdeng ki katto katne, ia ka bym pat dei ban tip ne pynbna paidbah. Kum kane ka ju long hapoh ki Dorbar Thaw Aiñ, ha kaba ki don ki jing-iatai niam bad ki jingiakren ki bym pat dei ban pynmih paidbah, hynrei ban iakren shwa tang para dkhot ka Dorbar. Kum kine ki jingiakren ne jingiamir jingmut, ha ka kyntien Phareng, ki ong IN CAMERA. Katba ha ka kyntien Khasi ki ong PURAMIT.
Ha kine ki por mynta, ka ju mih kaba pyndonkam ha ka kyntien Phareng, kaba ong ka INFORMATION TECHNOLOGY. Ka kyntien INFORMATION ka mut hi, kaba lum ia ki jingtip bad ruh ka jingpynphriang ia ki jingtip. Katba ia ka kyntien TECHNOLOGY, ka mut ka jingstad ba la iaid shakhmat, katkum ki por mynta, ia kaba ha ka kyntien Khasi, lah ban ong ka JINGSTADTIP.
Ia kiei kiei kiba pynmih bor ding ha ka kyntien Phareng ki ong FUEL, katba ha ka kyntien Khasi ka long ki TYLLAW. Namar dei na ki TYLLAW ba ioh ia ka bor phliah ding, kum na ka umphniang. Namar kata haba tbeh ne pynmih ia kano kano ka bor ding ka kyntien Phareng ka dei ka IGNITE. Ha ka kyntien Khasi, lah ban ong TBEH, THANG lane PRUID. Hynrei ka kyntien IGNITE kan kham iahap bad ka kyntien Khasi, kaba ki ong SHAMOK. Haba phi SHAMOK, ka mut ba phi tied kyrshut ia ar tylli ki Mawleiñ kiba ki ong ki Maw Shamok, bad sa mih ki phliah ding.
INTELLECTUAL ha ka kyntien Phareng ka mut ia ki briew kiba don sap bad kiba proh ki jingmut jingpyrkhat, kiba nep jingmut kum u Peh Sylli – kata u kynja siej uba nep hir hir, uba lah ban pynpei phang. Haba shim kyllum ia kine ki jingmut jong ki kyntien Khasi ia ka kyntien INTELLECTUAL, lah ban ong KHRAW PYRKHAT. Kaba ngi lah ban ong ba uta uta ne kata, ki dei ne ki long ki KHRAW PYRKHAT. Ha ka kyntien Khasi, kaba pyrshah ia ka jingmut KHRAW PYRKHAT ka dei ka JUTIA – kaba mut kaei kaei kaba la sarang, na ki kynja nar ne nar poh khyndew. Ki sa ia ong ba uta uta ne kaba kaba ki dei ki khlieh pyrkhat JUTIA
INVITE ha ka kyntien Phareng, ka mut da ka jingkhot sngewbha mynsiem iano iano ban ia don lang don ryngkat, kum ha ki khawai dawai, ki jingialehkmen sngew-bha, ne khot sngewbha ban ia wan kai sha ïing sha sem. Ha kaba iadei bad ki kam paidbah, la ju thoh ruh ha ki Khilon ne ki Putar, ia ki kyntien NGI KHOT SNGEWBHA lane WELCOME ha ka kyntien Phareng. Hynrei ka kyntien Khasi kaba shibeit kaba mut ia ka INVITE ka dei ka DAWOT.
INSTITUTE ha ka kyntien Phareng ka mut ban buh ne ban sdang ia kaei kaei, kaba mut ruh kata kaba ha ka kyntien Khasi, lah ban ong SHLEM – Ka lah ban long ka INSTITUTE lane SHLEM hikai jingstad, jingpule, jong kano kano ka seng ne kynhun ne jong ki bor synshar khadar ne jong ka sorkar.
Katto katne ki kyntien khyndiat kum ka INVALID, ia kaba ha ka kyntien Khasi ka long KHREW. Haba ia ka jingmut jingpyrkhat ne ka jinglong, la btin ne ialam noh da kiwei pat, ka kyntien Phareng ka ong INFLUENCE. Ka kyntien Khasi ka ong SHAH IALAM.
