AIZAWL, Lber:
Ka seng Chin Defence Force (CDF), ka la kyntait ha kaba iadei bad ka jingdonkti ban shim ia ka jingim jong 3 ngut ki nongshong shnong ka Mizoram ha kaba ka Mizoram Police naduh nyngkong ka la kdew kti beit ia katei ka kynhun halor kane ka jingjia.
Ka CDF-Mindat kaba long kawei na ki kynhun kieng atiar kaba iakhun ban iada ia la u jong u pud u sam ka la pynrem jur halor ka jingshah pyniap kitei 3 ngut ki nongshong shnong bad phah ruh ia ka khubor sngewlem sha ki bahaiing hasem jong kito kiba la ngat ha katei ka jingjia.
Ka CDF lyngba kawei ka jingthoh ba ka pynmih ka la pynpaw shai ba ka sngewsih jur halor kaei kaba la jia ia kitei 3 ngut bad kaba kham bynñiaw bha ka long ruh ba kitei 3 ngut kiba shah pyniap ki la thmu ban leit ai jingiarap sha ki briew ka shnong Myain bad ban thied ruh ia ki jingdonkam jong ki.
Hynrei ha ka sngi u Blei jong ka taiew ba la leit ki pulit ki la lap pynban ia ka metiap jong kitei 3 ngut na khappud ka Myanmar bad kdew kti beit ia ka seng Chin Defence Force (CDF), kiba la leh ia kane ka kam.
Ki pulit ka Mizoram ki la suba sniew ba ka jingshah pyniap jong kitei 3 ngut ka dei imat tang na ka daw jong ka pisa kaba ki la kit ha kaba ki la suba ruh ba kane ka pisa kam dei satia na ka bynta ban leit ai jingiarap ne ban thied marbam hynrei ka dei na ka bynta ban thied ia ki tiar siat.
Shuh shuh kaba pynsuba sniew ruh ia ki pulit ka dei ba hadien ba la dep ban pyniap ia kitei 3 ngut la thang ruh ia ka metiap jong ki ban nym ithuh.
Kine kiba la shah pyniap la tip kyrteng kum u C Biaksuii (48) alias Suiteii Chinzah, Bablu Talukdar (37), bad B Lathafamkima (44).
