Imphal, Lber:
Katkum ki khubor la iathuh ba 5 ngut ki longkmie kiba long ki dkhot nongkitkam jong ka seng Congress ha Imphal, ki la mynsaw na ka jingialeh pyrshah bad ki bor pulit ha ka sngi palei hadien ka jingshah kawang bom. Da ki bun ngut ki kynhun pulit ki ialeh katba lah ban nym ailad ia kine nongtrei jong ka seng congress napoh ka historic Kangla western gate.
Haba iadei bad kane, ki paidbah nongshong shnong ka Imphal ki la pynpaw ka jingsngewsih bad ka jingsngew khia kaba jur haba iadei bad ka jingshah weng u nongialam jong ka seng Congress u Rahul Gandhi kum u MP ha kine sngi ba la dep.
Kumta ia katei ka jingiaid paidbah la sdang napoh ka jaka treikam jong ka seng Congress ha Bhawan sha Kangla gate kumba 100 meters eiei ka jing jngai bad ki la pynkut ia katei ka jingiaid paidbah da kaba jaijai.
Hynrei la ong ba hapdeng ka jingthang mombati jong kitei ki dkhot ka seng Congress, la leit ban pynlip bad pynsangeh noh da ki kynhun pulit kynthei.
Namarkata ka la mih ka jingiakajia hapdeng ki pulit bad kitei ki dkhot jong ka congress bad hadien katto katne por ki pulit jong katei ka thaiñ ki la nang phah shuh shuh ia ki kynhun pulit da kaba khang pyrshah ruh ia ka jingleit tur jong kitei ki dkhot ka seng Congress sha katei ka gate bad dei ha katei ka por ba ka la mih ka jingïakynad kaba jur hapdeng jong katei ki ar kynhun.
Hadien katei ka jingjia, la pynkit noh mar mar ia kitei ki longkmie ba la mynsaw sha ka jaka sumar ba kham hajan naka bynta ki jingsumar ba bniah.
Hadien katei ka jingjia, ki nongkyrshan jong ka Congress ki la sdang ban pyrshah da kaba rah ia ka placard, ‘Ka synshar khaddar ka don jingma’ ha ryngkat ka jingpyrta “PM Modi Murdabad,’ bad ‘Rahul Gandhi Zindabad’ ha ka jingialam jong ka vice – president ka MPCC ka L. Tilotama Devi kaba la lam khmat ban iaid shakhmat khlem kynran dien wat hapdeng ka jingshah khang ha ki bor pulit.
Namar kata la ong ba kitei ki nongialam ka Congress ha ryngkat ka jingkyrshan jong ki paidbah, ki la mih shakhmat ban pynsngew sha ka Sorkar ba ka BJP kan ym lah da leilei ruh ban pynsangeh ia ka Congress katba ka dang iakhun shitom ba wanrah ia ka hok jong ki paidbah bad ka imlang- sahlang.
Kumjuh ruh u President ka Manipur Pradesh Youth Congress, u N.Popilal u la ong ba ka Congress ka khmih lynti bad ngeit skhem ruh ba kan lah ban khie khlieh biang ha ka jingiakhun ilekshon ka ban long ha u snem 2024, ha kaba yn jied ia ki MP ba thymmai jong ka jylla bad u la ong ruh ba ka por jong ka BJP kan kut noh ha katei ka ilekshon.
