New Delhi, Lber:
Ki ar tylli ki kynhun ialehkai Kriket ha ka lympung Indian Premier League ka ban sdang ha ka 31 tarik mynta u bnai, kita ka Delhi Capitals bad ka Mumbai Indians ki la pynbna ia ki kyrteng jong ki rangialehkai ki ban mih bujli ha ka jaka jong ar ngut ki rangialehkai ba pawkhmat jong ki, kita u Rishabh Pant bad Jasprit Bumrah, ha kaba u Pant u lah shah pynmih bujli mynta ha ka jaka jong u da u Abhishek Porel ha ka kynhun Delhi Capitals bad u Sandeep Warrier u lah kylla long u rangialehkai ban ioh mih bujli ha ka jaka u Bumrah ha ka Mumbai Indians.
Naba ka jinglong jingman jong kitei ki arngut ki rangialehkai lah tip ia ka dang ha ki katto katne sngi ba lah leit noh, kumta ruh ka MI bad ka DC ki lah shim ia ka por jong ki na ka bynta ka jingkhein jingdiah ha kaba iadei bad ki rangialehkai kiba bitdor na ka bynta ban long ki nongmih bujli bad kiba lah pynbna ruh ia ki kyrteng jong kita kii rangialehkai ba thymmai ha ka sngi ba lah plie pyrda ia ka tei ka lympung ialehkai mynta u snem.
Shuh shuh ruh ka khubor ka iathuh ba u Pant un ym lah ban shimbynta ha ki jingiakhun bad ka kynhun ha baroh shi lynter jong ka aiom ialehkai ka lympung namar ki jingshitom bad jingmynsaw ki jong u kiba u lah ioh naduh ka sngi ba u lah mad ia ka jingityngkhuh kali kata ha ka 30 tarik u Nohprah 2022. Katba u Bumrah pat u lah hap ban weng noh shuwa ialade sharud ha ka pork aba jlan bad u bym shym la ioh ruh ka lad ban mih iakhun ha ka Asia Cup bad kumjuh ruh ha ka T20 World Cup 2022.
Kum ban shu pynkynmaw biang hangne ka long ba ka Mumbai Indians kan sdang ia ka jingiaid lynti ha katei ka lympung iakhun mynta u snem da ka jingleit ban iakhun jong ka Shabar na-iing pyrshah ia ka RCB ha M. Chinnaswamy Stadium kaba ha Bangalore ha ka 2 tarik u Iaiong.
