Ahmedabad, Lber:
Ka jingïakren ha kaba ïadei bad ka pule-puthi ha ka jylla ha Gujarat ka la khihwin bha haka por ba don ka ilekshon Assembly ha kine ki khyndiat bnai ba la leit, ha kaba ka la pynlong ïa ki lad phah khubor ba kin pynpaw ïa ka jingïakhun pyrshah hapdeng ka seng AAP bad ka BJP.
Ki heh sorkar ha katei ka por ki la pynshisha ba ki rukom pyntreikam ha kaba ïadei bad ka pule-puthi ha Gujarat ka long kaba bha eh.
Ha kaba ïadei bad kane, kajuh ka sorkar BJP ka la pynpaw hapoh Assembly ba ki la don palat 32,000 tylli ki Post jong ki nonghikai bad ki Principal ïa kiba la sah thylli ha kiba bun ki skul sorkar bad kiba hap hapoh ka jingkhmih jong kan sorkar la ka long ha ki skul Secondary bad ki Higher Secondary School.
U Myntri ba dei khmih halor ka tnat pule-puthi u Kuber Dindor u la pyntip hapoh ka ïingdorbar kum ka jingai jubab halor kiba bun ki jingkylli ba la wan na ki MLA jong ka seng Congress shaphang ka pule-puthi ha ka jylla ba, kumba ka long ha u Nohprah jong u snem 2022, ki la don kumba 29,122 tylli ki kam nonghikai bad 3,552 tylli na ka bynta ki Principal kiba sah thylli ha ki skul sorkar bad kiwei pat kiba hap hapoh ka jingkhmih jong ka sorkar kata ha ki skul Gujarati bad English Medium kiba don ha kylleng ka jylla.
Katkum ka jingïoh lum jingkheiñ la ong ba na kine ki 32,674 tylli ki Post ba lait, 20,678 tylli ki dei kiba dang sah thylli ha ki skul sorkar bad kiwei pat ki skul ba hap hapoh ka jingkhmih jong ka sorkar katba 11,996 tylli ki Post nonghikai bad Principal ym shym la lah ban pyndap.
Ki la don baroh kumba 17,500 tylli ki kam nonghikai ba sah thylli ïa kiba ym pat shym la lah ban pyndap. Ki la don kumba 1,507 tylli ki kam nonghikai kiba sah thylli tang ha Kutch distrik, 1,152 tylli ha Dahod, ha kaba la don bun ki nongshong shnong kiba dei ki riewlum, 869 tylli ha Banaskantha, 724 tylli ha Rajkot, bad 692 tylli ha Mahisagar. Shuh shuh kumba la ïoh jingtip la ong ba ym shym don ki skul Secondary English-Medium School ki ban dei jong ka sorkar na ka bynta ki klas 9 bad 10 ha ki 14 tylli na ki 33 tylli ki distrik kiba don ha Gujarat.
Kumjuh ym shym la don ki English-Medium Higher Secondary Schools ki ban pyntreikam da ka sorkar jylla na ka bynta ki klas 11 bad 12, bad kim shym la don wat tang kawei ruh ka skul kaba ban lah ban ai jingkyrshan ha kaba ïadei bad ka jingpule ïa ka ktien phareng napdeng ki 31 tylli ki distrik.
Katkum ka jingkhmih lynti, la ong ba ki bor ba dei khmih ki la dei ban pyndap katba lah ïa ki jaka ba lait ha kitei ki skul bad ban ïaleh katba lah ban pynbiang sha ki skul ïa ki nonghikai kiba tbit ki ban lah ban kyntiew ïa ka pule puthi jong ki khynnah skul ha ki thaiñ bad ki jylla hi baroh kawei. Kane kan sa lah ban kyntiew ïa ka lawei jong ki khynnah.
