Jaipur, Lber:
Ka Rajasthan High Court ha ka sngi Balang ka la pyllait noh ïa baroh saw ngut ki briew kiba la shah kynnoh donkti ha ka jingbthei bom kaba la jia ha u snem 2008 ha Jaipur. Ha kane ka jingjia ki la don 71 ngut kiba iap bad palat 180 ngut pat kiba mynsaw.
Kine kiba la shah kynnoh ki la dei ban shah pynïap ha ki kti jong ka aiñ kumba la hukum ka ïingbishar kaba la tian bishar ïa ki ha u snem 2019 ha kaba ki la pynibor hapoh ka High Court.
Ka High Court ka la kynthoh jur ïa ka kynhun tohkit halor ka jingbym bniah bad leh thurmur ha kaba ïadei bad ka jingtohkit ha kaba ïadei bad ki sabut ba la ïohlum.
Ka Jaipur ka la khih win na ka jingdon jong bun tylli ki jingjia bthei bom ha ka 13 tarik, Jymmang, 2008 haba uwei u bom u la bthei hadien uwei pat ha Manak Chawk Khanda, Chandpole Gate, Badi Chaupad, Chhoti Chaupad, Tripolia Gate, Johri Bazar bad ha Sanganeri Gate.
Ki bom kiba la bthei ha ka por janmiet ka la shim ïa ka jingim jong ki 71 ngut ki briew bad palat 185 ngut kiwei pat ki la mynsaw jur.
Uwei u bom ïa u bym shym la bthei la lap noh najan Ramchandra Temple ha kaba la lah ban pynduhbor noh ïa u da ka kynhun pyllip bom.
Ha u Nohprah jong u snem 2019, ka ïingbishar bakyrpang ka la ai da ka rai ban pynshitom da kaba pynïap ha ki kti jong ka aiñ ïa ki saw ngut ki briew kiba kynthup ïa u Mohammad Saif, Mohammad Salman, Saifur bad u Mohammad Sarvar Azmi bad la pyllait noh ïa uwei pat, ïa uba la tip kyrteng kum u — Shahbaz Hussain.
Katba ka sorkar jylla ka dang ïakhun pyrshah halor ka rai ban pyllait noh ïa u Shahbaz Hussain ha ka High Court, ki saw ngut kiba la shah rai ban shah pynïap ha ki kti jong ka aiñ ki la buh da ka jingkyrpad pyrshah ïa ka hukum jong ka ïingbishar kaba la bishar ïa kine kiba la shah kynnoh.
Ka kynhun nongbishar jong u Pankaj Bhandari bad u Sameer Jain ka la pynbna ha ka sngi Balang ba yn pyllait noh ïa kine baroh saw ngut kiba la shah rai pynrem ha ka ïingbishar halor ki jingshah mudui.
Ka ïingbishar ka la pynshai da kaba ong ba u briew uba san, kata u Shahbaz Hussain, un sa shah pyllait ha ka ïingbishar ba kham hapoh katkum ka hukum jong ka.
