Karachi, Iaïong:
Katkum ka khubor ba la ioh lum ka iathuh ba ka kynhun ialehkai Kriket ka ri Pakistan ka lah byrngem ban ym shim bynta ha ka lympung ialehkai ICC Cricket World Cup 2023 ia kaba lah dep pynbeit ban pynlong mynta u snem ha ri India, lada ka Board of Control for Cricket in India (BCCI) kan ym shah ia ka kynhun ialehkai jong ki shynrang ka ri ba kin shimbynta ha ka Asia Cup 2023.
Kumta kata ka kynhun ialehkai jong ka Pakistan ka pynpaw ia ka jingkwah jong ka ban ialehkai ia ki jingialehkai WC ha Bangladesh ne ha Sri Lanka hynrei ym pat ha India.
Hynrei katkum ka khubor ba lah ioh lum ka long ba ia katei ka lympung ialehkai WC mynta u snem lah dep ban pynkhmati sha ka ri India ba ka ban plie pyrda ia ka lympung ialehkai naduh u bnai Risaw haduh u Naiwieng mynta u snem.
Shuh shuh ruh ka International Cricket Council (ICC) shen kan sa pynbna ruh ia ka prokram ialehkai ba pura jong ka lympung ha ki khyndiat sngi khyndiat bnai ki ban wan. Ha ki khyndiat sngi ba lah leit noh lah mih ka khubor ba ka kynhun ialehkai ka ri kan shimbynta ha ki jingiakhun jong ka ha ka lympung Asia Cup ha ki madan ialehkai bym shym la don sha kano kano ka ri bad ka ban ym leit satia sha ri Pakistan.
Hynrei lada ka India ka poi sha ka jingiakynduh phainal bad ka Pakistan, kata ki jingiakhun jong ki ar kynhun kan long ha kano kano ka madan ialehkai ka bym don satia sha kano kano ka ri.
Haduh mynta ka jingiakren ka lah nang iaid shakhmat ha kaba yn sa sakhi ruh ia ka Pakistan kan rah ia ki jing-ialehkai jong ka sha kita ki madan ialehkai ki bym shym la don sha kano kano ka liang bad ka ri Bangladesh ka lah shah tyrwa mynta kum kawei na ki madan ialehkai na ka bynta ki jingiakhun.
Ha kaba iadei bad ka Asia Cup mynta u snem, ka ri Pakistan ka long ka ri kaba lah thikna ha ka ban pynlong ia ka lympung, hynrei ka kynhun ialehkai ka India ka pynpaw ia ka jingkwah jong ka ban ialehkai ia ki jingialehkai jong ka baroh ha ka madan ka bym shym la don sha katei ka ri.
Kumta ruh ka lympung ialehkai Asia Cup ia kaba yn sa shimbynta da ki 6 tylli ki ri kiba hap hapoh ka dewbah-Asia, ia ki jingialehkai baroh yn pynialehkai haduh 50-over ha ka bynta ba nyngkong jong u bnai Nailur bad ha kaba lah kynthuplang ruh mynta ia ka kynhun ialehkai ka India & Pakistan ha kajuh ka group ryngkatlang bad ki ri ban iakhun na ka bynta ban ioh rung sha ka lympung.
Katba ka Sri Lanka, Bangladesh bad Afghanistan ki long kiwei pat ki ri jong kawei pat ka Group ialehkai kiba lah ioh ban shimbynta ha ka lympung.
