Byrngem ki Meitei ïa ki Khasi kiba sah ha Manipur ban leit phai noh sha Meghalaya

Shillong, Ïaïong 02:

Ka jingshah shoh jong uwei u briew uba dei na ka jaitbynriew Naga ha ki Meitei kiba shong ba sah ha Khedagor ha ka Sngi U Blei ka la pynlong ’langknia ïa ki Khasi kiba sah ha katei ka shnong ba kin shah byrngem ha ki Meitei kiba la phah ban mih noh na katei ka shnong ban leit phai noh sha Meghalaya.

Kane ka jingshah shoh u Naga ha ki Meitei ka dei kaba jia mynta ka Sngi U Blei ha katei ka shnong kaba ju sah ki Khasi bad ki Naga kaba la pynlong ban mih ka huri-hura.

Ha kane ka shnong ki Khasi ki don kumba 1500 ngut kiba im da kaba rep kwai bad tympew ryngkat ka jingïadonlang ruh ki jaitbynriew Naga, hynrei man ka por ki Bengalee bad ki Meitei ki ju wan kyntur ïa u pud u sam sha kiba sah ki Khasi.

Halor kane ka jingshah byrngem ki Khasi, ka Khasi Students’ Union (KSU) seng kmie ka la pyntip sha ki nongïalam ka All Manipur Students’ Union (AMSU) ba kan tuklar lem halor kane ka jingïakynduh jingeh ki jaitbynriew Khasi khnang ban ïoh ïa ka shong suk shong shngaiñ.

Haba ïakren bad u Bah Donald Thabah uba dei u General Secretary ka KSU seng kmie, u la ïathuh ba mynshem snem ka KSU ka la leit ban ïakynduh ïa u Myntri Rangbah ka Manipur u N Biren Singh hadien ka jingshah klun jaka ha ki Bengalee ha ka shnong Khasi kaba khot Khedagor uba la kular ban kyndang ïa kine ki Bengalee kiba wan sah be-aiñ. Hynrei ka sorkar kam shym la leh eiei, pynban ka tnat Khlaw ka la buh da ka signboard ban nym shah ban rep ban riang ha kane ka jaka.

“Ki la bun ki Khasi kiba la phet na katei ka jaka namar ki ju shah pyndik kaba la pynlong ïa ka seng KSU ban ïakynduh syndon ïa u CM ka Manipur ban ai jingïada ïa ki Khasi ha katei ka jylla” u la ïathuh.

Shuh shuh u la ïathuh ba ha kine ki sngi u Rangbah Shnong Khasi u la shah shoh ha ki Bengalee bad mynta ka sngi u la shah shoh sa u Naga ha ki Meitei kaba la pynlong ïa ki Meitei ban byrngem ïa ki Khasi ban phah mih noh ban leit sha Meghalaya.

Kumta ban lait na ka huri-hura ka KSU ka kyrmen ba ka sorkar Manipur kan wanrah ïa ka jingshong suk shong shngaiñ ïa ki Khasi hapoh katei ka jylla.