Shillong, Ïaïong 02:
Hadien lai bnai jong ka jingshah siat ïap ki Khasi ha ki pulit Assam ha shnong Mukroh, West Jaiñtia Hills, ka seng jong ki nongrep ba la tip paidbah kum ka Hill Farmer Union (HFU) hapoh ka jingïalam u Bah Commander Shangpliang kum u President, ha ka 1 tarik Ïaïong, 2023 ka la leit sha shnong Borato bad Mukroh ban pynshai paidbah ha kaba ïadei bad ka rep ka riang.
Ka jingthmu jong ka HFU ban leit ïuh kjat ha kitei ar tylli ki shnong ka long ban wad jingtip na ki nongrep ba haduh katno ki ïoh ïa ki jingmyntoi, hato ki ïoh ne em ka jingïarap na ka sorkar.
Na ka liang jong ki nongrep ki la pynpaw ba kim shym la ïoh ka jingïarap na ka sorkar ha kaba ïadei ban kyntiew ïa ki mar rep, namar ki mar rep kiba ki ju rep ha kine ki shnong ki kynthup ïa u synsar, u shynrai, u sying, u sohphan, u khaw bad kiwei kiwei.
Nangta ki la pynpaw ruh ba ka daw jong ka jingduna ka jingrep ka dei na ka jingbym biang bha ka um.
Ha Barato, kaba dei ruh ka shnong ba shah ban beiñ ha ka sorkar bad ki nongmihkhmat namar bym don ba ïalam ïa ki, namar ki nongshong shnong ha kine thaiñ kim ithuh ïa ka tnat kam rep jong ka sorkar jylla. Kumta ki donkam mynta ïa ki ïew, ki kali ban kit, u symbai bad ka jingïarap na ka sorkar ban pynpoi um sha ki jaka rep.
Haba ai jingkren ha kane ka jingïalang, u Bah Commander kum u President u la pynshai sha ki paidbah jong kine ki ar shnong ba ka Hill Farmer Union ka dei ka seng jong ki nongrep bad ka dei ka seng ban peit beit tang ïa ki jingeh jong ki nongrep, ha ka jingbym biang ïa ki symbai, ka jingbam khñiang ïa ki jingthung jingtep, ka jingpynjulor jong ka mariang bad kiwei kiwei ki jingeh.
U la ong ba ki nongrep ki dei ban don la ki jong ki jong ki shnat (unit) ha man la ki shnong ki thaw khnang ban lah ban ïaleh ïa ki jingeh, la ong u Bah Commander.
U la ïathuh ba ki nongrep hapoh ka jylla ki la don palat shi lak sanphew hynñiew hajar ngut ki nongrep bad u khmih lynti ban sa kiew haduh ar lak ngut ki nongrep kiba don kyrteng ha ka HFU.
Namarkata, u kyntu ïa ki nongrep ba ki dei ban don la ka jong ka shnat treikam khnang ba lada ki don ïa ka jingeh kin pyntip sha ki nongïalam.
Ha kaba ïa dei bad ka jingjia ha Mukroh, u pynpaw ba ka dei ka jingjia kaba sngewsih, hynrei ka seng ka kwah ban peit tang ïa ka jingeh jong ki nongrep.
“Ngim lah ban seng ïa ka kynhun ki nongrep tang namar ba ngi shah pyndik ha ki pulit, hynrei ngi seng ban peit ïa ka jingeh ki nongrep ha kiba bun ki liang” u la ong.
Ha kawei ka liang u la pynpaw ka jingbym sngewïahap ba ki pulit kin pyndik ïa ki nongrep, kin tuh ïa ki jingri, ïa ki mar rep, hynrei ka kamram jong ki pulit ka dei ban ïada ïa ki nongrep.
