Shillong, Ïaïong 02:
Ha ryngkat ki paid ’riewngeit ha satlak ka pyrthei, ki ’riewngeit Katholik ha Meghalaya ruh ki la rakhe ïa ka Sngi U Trai Sla Tlai kum ka jingkynmaw ïa ka jingwan rung u Jisu sha nongbah Jerusalem ha kaba ki paid byllien ki la pdiang burom bad kaweh ïa ki sla tlai.
Ka jingleit u Jisu sha Jerusalem ha ryngkat ki synran ka dei tang khyndiat sngi hashwa ban poi ka sngi shah shitom jong u ha ka Sngi Thohdieng bad shah ïap halor ka diengphna.
Ka jingrah ïa ki sla tlai ka dei kaba ki paid ’riewngeit ki la ïashimbynta ha ka por mynstep hashwa jong ka Mass bakhuid. Hadien ba la dep kyrkhu ïa ki sla tlai la sam sha ki paidbah bad la bud sha ka jingïaid proseshon sha ïingmane na ka jaka ba la kyrkhu ïa ki sla tlai.
Ki paid ’riewngeit ki la ïarwai ïa ka jingrwai Hosanna ryngkat ka jingkaweh ïa ki sla tlai ha kti. Ka jingrakhe ïa ka Sngi U Trai Sla Tlai da ki ’riewngeit Katholik ka dei kaba la leh ha kylleng ka Jylla ha la ki jong ki Parish bad ki jaka ha ryngkat ka jinglehniam lyngba ki Lyngdoh Sohblei.
Kiwei kiwei ki ’riewngeit Khristan ruh ki la kynmaw ïa kane ka sngi da kaba pynlong jingïaseng bad jingduwai ha la ki jong ki ïingmane.
Kum ka jingkynmaw, u Jisu haba u don ha lynti sha Jerusalem lem bad ki synran jong u, u la poi ha u Lum Olib bad haba u la poi hangta, u la shong da ka kada ban rung sha nongbah Jerusalem ha kaba ki paidbah ki la kynhoi bad pdiang ïa u da kaba kaweh ïa ki sla tlai bad rwai artad, “Hosanna, long uba la kyrkhu uta uba wan ha kyrteng jong u Trai” bad kane ka la pynlyngngoh ïa kiba bun ha nongbah Jerusalem bad ïa kylli para maki, une u briew u dei uei.
