Shillong, Ïaïong 02:
Ka Elite Pathway Programme (EPP) kaba dei ka prokram ai jinghikai kaba lai sngi ba la pynlong da ka Meghalaya State Olympic Association (MSOA) ryngkat ka jingïatreilang bad ka tnat Directorate of Sports & Youth Affairs ka la sdang ha ka shlem ai jinghikai jong ka SAI, STC, Shillong, ha campus ka skul bah NEHU ha ka sngi Saitjaiñ.
Ha kane ka sngi u Bah AL Hek, Myntri Sorkar ba dei khmih ïa ka tnat Animal Husbandry & Veterinary u la ïadon lang kum u kongsan bad ban plie ïa kane ka prokram ai jinghikai ha ka jingïadonlang u Chief Secretary ka sorkar jylla u Bah DP Wahlang, IAS, ki nongïalam ka MSOA bad kiwei kiwei.
Ki nongwan ai jinghikai ki dei u Ian Campbell na ka EDGE10, ryngkat ka jingïadon lang u rangïalehkai phutbol ba la paw ka ri Denmark bad ba la mihkhmat ïa ka Manchester United u Jesper Olsen na ka kynhun jong ka Future Football.
Ki nongïalehkai ba la poi sha kane prorkam ki dei tang kito ki 200 ngut na ka 4500 ngut kiba la ïashimbynta ha ka prorkam ïit sap ïalehkai kaba la pynlong ha baroh ki distrik jong ka jylla ha ki sngi bad bnai kiba la leit noh.
Ka jingpyrshang ïa ki khynnah ha kane ka camp ka kynthup ïa ka vertical jump, compass drill, 10m ladder run bad ka 20m sprint, katba na ka liang u Olsen pat u shim ïa ka bynta ban ïarap ban sam ïa ka jinghikai bad jingtip shaphang ka phutbol.
Haba kren kum u kongsan, u Bah AL Hek u dap da ka jingkyndit bad bym lah ban mutdur satia ban shem bad ïohi ïa kata ka buit bad ka rukom ban test ïa ki khynnah ban saiñ dur ïa ka lawei ïalehkai kaba pura ka jong ki ka long kaba la pher bak ly-bak.
U Bah Hek u kyrmen ba shisien ka sngi ka jylla kan sa lah shisha ba kan sei ïa ki khlur ïalehkai ba kynsai bad kiba lah ban wanrah ïa ka nam bad burom ïa ka jylla, ïa la ka ïing ka sem bad ha ka juh ka por ban pynpaw hakhmat ka pyrthei ba ka Meghalaya ruh ka lah ban sei madan ïa ki nongïalehkai ba tbit bad ba kynsai.
Katba na ka liang u Bah DP Wahlang, u la ong ba ki nongïalehkai ha ka juk kaba mynta ki long kiba donbok, namar ki ïoh ïa ka kabu ba kin ïaid lang ryngkat bad ka juk jong ka teknoloji.
U Bah Wahlang u la kam ruh ba 40 snem mynshwa, ma u ruh u la poi ban ïashim bynta lem ha kum kine ki rukom jingpyrshang ha Patiala, hynrei ha kito ki por ki jong u, ki kor ki bor ba la pyndonkam ki long kiba dang duna bad tlot bor bha lada ïa nujor bad ki kor ki bor kiba ha kum kane ka juk kaba mynta.
Ha kane ka sngi la ïoh ruh ïa ka jingkren maitphang ba la ai da u working president ka Meghalaya State Olympic Association (MSOA) u Bah John F Kharshiing, uba la ai khublei ïa ka sorkar jylla halor ka jingïarap bad kyrshan lem na ka liang ka jong ka ban lah ban wanrah bad ban pynlong ïa kum kane ka prokram hangne hapoh ka jylla, khlem da klet ruh ban pynpaw ïa ka jingai khublei ïa ka sorkar, kaba la wan shakhmat ban sdang ban ai ïa ka baibam (scholarship) ïa ki khynnah ïalehkai bad ki song khusnam pisa ïa kiba ïoh ban khur ïa ki takma na ki lympung ne rynsan bah ïalehkai ba long ha ka thaiñ, ha ka ri ne wat shabar jong ka ri.
Katba na ka liang u Ian Campbell u la pynpaw ba ha kane ka kynti kaba mynta la don ki khynnah kiba ym tang ba ki pynpaw ïa ka jingtbit ne ka sap ba ki don, pynban ki la pynpra ruh wat ïa ki rikod bad u la ban jur ïa ki khynnah ban long kiba minot bad ba trei shitom.
