Dehradun, ïaïong:
Ki nongshong shnong ha kumba 1,000 tylli ki ïing kiba don ha ki saw tylli ki distrik jong ka Uttarakhand ki la mudui pyrshah ba ki la don ki jingjulor jong ki ïing jong ki namar ka jingshna ïa ka Rishikesh-Karnaprayag Railway Line kaba dang ïaid shakhmat mynta, la ong ki heh ba dei khmih jong ka Rail Vikas Nigam Limited (RVNL), ka kynhun kaba la pyntreikam ïa kane ka Project.
“Ngi la ïoh ïa ki jingmudui na kumba 1,000 tylli ki longïing halor ka jingjulor jong ki ïing jong ki bad ka jingorpait namar ki jingpynbthei bom ïa ki maw bad ka jingtih ïa katei ka lynti rel,” la ong u Vinod Bisht, u ophisar uba don ka jingïadei bad ka RVNL.
U Bisht u la ong, “Ki kynhun ba dei khmih ki la pynlong ïa ka jingleit jurip bniah sha ki shnong kiba don ha ki saw tylli ki distrik ha kaba ki la shah ktah jur na kane ka Project. Ka jingleit khmih bniah ka la kut noh ha Pauri bad Tehri Garhwal distrik. Ïa ki kaiphot halor kane ka jingleit jurip bniah ym pat ïoh pdiang.”
Ka lynti kaba jrong kumba 125.20 km-jong ka Rishikesh-Karnaprayag Rail Line ka la long ka Project kaba la pyntreikam da ka sorkar jong u Narendra Modi, ha kaba la mang ha ka jinglut kaba T. 16,200 klur.
Kane ka Project, kan sa don bynta bad ki 12 tylli ki jaka sangeh rel, ha kaba la thmu ban pynïasoh bad ka Rishikesh bad ka Karnaprayag bad kumjuh ruh ba kan sa pynsuk ha ka ban rung ha ki jaka mane blei bad ki jaka kyntang khamtam sha Kedarnath bad Badrinath.
Kane ka Project ka la ïaid lyngba ki san tylli ki distrik, kiba kynthup ïa ka Dehradun, Tehri Garhwal, Pauri Garhwal, Rudraprayag bad Chamoli.
Kane ka tnat Railway ka la donkam ïa ka jaka kaba 164.9 Hectares jong ki riew paidbah ha ki 45 tylli ki shnong, kaba long 20% ka jingdonkam jong ka jaka kata da 788 hectares na ka bynta ka Project.
Kiba dang sah ki la long tang ki jaka ba long khlaw, la ïathuh ki heh jong ka RVNL.
Ka jingshim jaka ka la ktah ïa kumba 355 tylli ki ïing bad 5,513 tylli ki longïing, la ong ka RVNL.
Ka jingpyntreikam halor kane ka Project ka la sdang ha u snem 2017 bad ka la don jingthmu ban pyndep ha u Nohprah jong u snem 2024.
Ha u Kyllalyngkot, ka Indian Railways ka la phah jingthoh lyngba ka Twitter ba ki la don kumba 33% ka jingtreikam jong ka Project ïa kaba la dep ban pyndep.
Ha Pauri Garhwal distrik, ka longïing jong u Anil Dutt Tiwari ka la long kawei na ki longïing napdeng ki 224 tylli ki longïing ha ka shnong Sweeth kiba dang ap ban ïoh ïa ka bailutksan na ka bynta ki jingjulor ka ïing jong u.
“Nga la pynlut da kumba T. 4 lak ka pisa na ka bynta ban pynbha bad maramot ïa ka ïing jong nga. Ngam shym kynmaw shuh haduh katno sngi ne kynta ba ngi la pynlut ïa ki por jong ngi ha ka ban leit sha ki jaka treikam jong ka sorkar ha ka ban leit ud leit nam bad pan jingïarap,” u la ong.
U la ong ba naduh kane ka por ka jingpynbthei ka la sdang naduh u snem 2019, u la buh da kiba bun ki jingkyrpad RTI ba la phah na ka bynta ban tip bniah shaphang ki jingpynbthei ha kaba ïadei bad ka jingpyntreikam bad haduh lano ki la dei ban dep bad ha kaba ïadei bad kane la don ruh ka jingïakhih ban pyrshah halor kane ka jingshna hynrei kam shym la sangeh.
Kumba la sakhi, la ong ba ka jingpyntreikam ïa kane ka lynti rel ka la ktah shibun ïa ki nongshong shnong khamtam haba ki jingktah ki la long halor baroh ki liang ha kaba kane ka la pyndik bad buh jingeh ïa ki nongshong shnong.
Ki nongshong shnong ki la kyrpad ïa ki heh ba dei khmih ba kin leh ïa kaba donkam khnang ba kane ka jingpyntreikam ïa kane ka lynti rel kan ym buh jingeh ei ei ïa ki paid nongshong shnong.
U la pynshisha da kaba ong ba ka jingshna ïa kane ka lynti ka la wanrah ruh ïa ka jingjaboh jong ka um bad ki tyllong um namar ki jaboh na ki nala ba la buh ki la leit tuid sha ki wah bad ki shnat um.
U Tiwari u la ong ba kam shym la don ka jingleit jurip katba ki nongshong shnong kim pat leit da ka bor ban phah khmih bniah ha kaba ki bor pynïaid distrik, ki la thaw ïa ka kynhun jong ki san ngut ki dkhot ha kaba ïadei bad ka jingkhmih bniah halor ki jingjulor ha u snem 2021.
