Tura, Ïaïong 02:
U Vice-President bad nongaiktien ka Meghalaya-BJP, u Bernard Marak lyngba ka kyrwoh u la ong ba ka seng kan sa pynlong da ka thma pyrshah ïa ka bamsap hapoh ka Jylla bad ha baroh ki konstitwensi.
“Ki paidbah ki la ‘vote’ ïa ka BJP da ka jingkhmih lynti ïa ka jingkylla bad ban pynkut noh ïa ka bamsap bad ngi ïeng skhem halor kiei kiba ngi la khlei ha ka por ilekshon pyrshah ïa ka bamsap. Kumta, ka ‘Thma pyrshah ka Bamsap’ kan bteng hapoh ka Jylla kumba u Myntri Rangbahduh ka ri, u Narendra Modi u la pynbna ha kine ki khyndiat sngi,” la ong u Marak.
U la ong ba ka Sorkar Pdeng ka la shimkhia ha ka ban pyntreikam ïa ki skhim jong ka na bynta man la uwei-pa-uwei u ’riew shimet bad ki longïing.
“Ïa ki skhim la ai kyrteng thymmai bad kim poi sha ki paidbah, kane ka dei ka mat kaba kongsan na bynta ka BJP namar ka jingïohi jngai jong u Myntri Rangbahduh ka shah pynrem bad ka burom ka leit sha ki ’riew shimet. Ka jingkyang bad ka jingshaniah jong ki paidbah ha u Narendra Modi kan ym long leh nohei,” u la ong.
Shuh shuh u Marak u la bynrap ba ki nongkitkam ka seng kin sa leit mih sha man la ki konstitwensi bad ki shnong kiba mad jingeh haba ïadei bad ki skhim ka Sorkar Pdeng kumjuh ban lum thup ïa ki jingbym biang ba ki mad haba phai sha ki jingmyntoi ba la pynbiang da ka Sorkar Pdeng kum ka surok, um, bording, rashon, ïing, ‘job card’ bad kiwei-kiwei.
“Ngin sa pynlong ïa ki jingpynsngewthuh paidbah halor ki jingmyntoi jong ki skhim ka Sorkar Pdeng lyngba ki rynsan lad pathai khnang ba ki paidbah kin ïoh jingshai halor ka jingïohi jngai jong u Myntri Rangbahduh jong ngi. Ngin pyntikna ba ka MDA-II kan leh ïa kaba bha tam ban pynbiang na bynta ki paidbah ym kumba long ha ki snem ba la dep,” u la ong.
