Shillong, Ïaïong 02:
Ka IIM-Shillong ka la pynlong ïa ka ‘Annual Convocation’ ba 14 jong ka ha ka Sngi U Blei ha kaba 5 ngut ki ‘Doctoral Scholar’ ki la ïoh pdiang ïa ka PhD, katba 238 ngut ki samla pule na ka PGP-2021-23, 43 ngut ki samla pule na ka PGPEX – 2022-23, 16 ngut ki samla pule na ka PGPWE-2020-22 bad 47 ngut ki samla pule na PGPWE-2021-23 ki la ïoh pdiang ïa ka ‘Degree’ MBA.
Haba ai ïa ka jingkren pdiang, u Chairman ka Board of Governor, u Shishir Kumar Bajoria, u la ai khublei ïa ki samla pule halor ka thong ba ki la kynjoh bad ban jur halor ka jingdonkam jong ka ‘Skill Development’ ban pynwandur ïa ka lawei jong ka India.
Kumta u la kyntu ruh ïa ki samla pule ban pyndonkam hok ïa ki jingpule kiba la ïoh pdiang na IIM-Shillong ban wanrah ïa ka bha ka miat ha ka imlang-sahlang.
Ha kane ka sngi, la ïadonlang u Myntri Khynnah ka tnad Electronics and Information Technology & Skill Development and Entrepreneurship, u Rajeev Chandrasekhar, kum u kongsan (lyngba ka ‘virtual mode’), bad u Gaurav Swarup, Co-Chairman & Managing Director ka Paharpur Cooling Towers Ltd, kum u Symbud Kongsan.
Haba pynsngew ïa ka ‘Convocation Address’, u Chandrasekhar u la ong ba ka India ka long kaba donbok ban kiew shaphrang lyngba ki sienjam kum ka ‘Digital India’ kaba la synñiang shi kat dei sha ka jingkiew jong ka ri.
U la ong ruh ba katba kiwei ki ri ki dang ïakhun ha ka jinghiar ka ïoh ka kot lem bad kiwei-kiwei ki jingtynjuh, ka India ha kawei ka liang ka bteng ban kiew bad long kum ka nonglamkhmat ha ka pyrthei.
“Nga kyntu ïa ki samla pule ka IIM-Shillong ban pyndonkam hok ïa ka jingpule jong ki bad ban synñiang na bynta ka jingkiew shaphrang jong ka ri kumjuh ban wanrah ka jingmanbha ha ka imlang-sahlang,” u la ong.
U la kdew ruh ba ka India bathymmai ka tyrwa kiba bun ki lad ki lynti na bynta ki khun samla ka ri ban tur shaphrang bad ki jingangnud jong ki bad ban kynjoh ïa ka thong lyngba ka jingtrei shitom.
U Chandrasekhar u la ai khublei ïa baroh ki samla kiba la pyndep ïa ka jingpule bad kyrmen ruh ïa ka lawei baphyrnai na bynta jong ki.
Na ka liang u Swarup u la ai khublei ïa ki samla pule bad ban jur halor ka jingdonkam ban pyndonkam hok ïa ka jingpule ban wanrah ïa ka bha ka miat ha ka imlang-sahlang.
Ka jingïalang ka la sakhi ïa ka jingïashim bynta jong 238 ngut ki samla pule kiba la ïoh ïa ki jingtyrwa kam na ki 63 tylli ki kynhun thung kam ha ki liang bapher-bapher ba kynthup ïa ka Consulting & Strategy, Finance, General Management, Human Resources & Operations, IT & Analytics, bad Sales & Marketing.
Shuh shuh u kongsan ha kane ka sngi u la pynkynmaw ïa ki sienjam jong ka Sorkar ha ka liang ka seng kam seng jam bad kyntu ïa ki samla pule ban shim kabu ïa ki lad ki lynti kiba wan sha ki.
Ha kane ka sngi la ïoh ruh ïa ka jingkren na u Director ka IIM-Shillong, Prof. D.P. Goyal, uba la pynpaw ïa ka jingsarong halor ka jingjop jong ki samla pule bad ai jingïaroh ïa ki nonghikai kumjuh ki nongtrei haba ïadei bad ka jingtrei shitom jong ki.
