Shillong, Ïaïong 02:
U MLA ka Mawhati uba long ruh u dkhot ka Ri-Bhoi Regional Committee, Bah Charles Marngar u la ong ba un don beit ha ka liang ki paidbah lada ka Sorkar kam sngap ïa ki jingpynsngew jong ki haba ïadei bad ka jingpynbeit pud na bynta ka kylla ba-ar bad ka Assam.
Ka jingthmu jong katei ka komiti kaba dang shu thaw shen da ka Sorkar ka long na bynta ka kylla ba-ar jong ka jingpynbeit pud bad ka Assam.
“Lada ka Sorkar ne ka Regional Committee kim sngap ïa kaei kaba ngi kwah, ka nongrim jong nga, nga la kren shai ba ngan don beit ha ka liang ki paidbah namar ïa nga la pynjop da ma ki,” la ong u Bah Marngar haba kren bad ki nongthoh khubor.
Haba kdew ba u la rah ïa ka mat halor ka jingpynbeit pud na bynta ka kylla ba-ar hapoh ïingdorbar thawaiñ, u la pynkynmaw ba u la ktah khyndiat haba ïadei bad ka soskular ba la dep soi jong ka kylla banyngkong namar ka jingpyrshah jong u paidbah ba bun ba lang haduh ba wat ki 4 tylli ki Hima Khasi ki leit ban ujor da ka mukotduma hapoh ka ïingbishar ba hakhlieh duh ka ri.
“Kane ka pyni shai ba ki paidbah jong ngi kim hun ïa kane ka soskular ba la ïa soi da ki 2 ngut ki Myntri Rangbah – Meghalaya bad Assam hakhmat u Myntri ka tnat kam pohïing ka Sorkar Pdeng, u Amit Shah,” u la ong.
Halor ka jinglong dkhot jong ka Regional Committee, u Bah Marngar u la ong ba u pdiang ïa katei ka sienjam khnang ba un ïoh pynpaw ïa ki jingeh kaba ki paidbah ka thaiñ khappud ki ïakynduh.
U la ong ruh ba ki jingpynpaw jong u kin ym dei ki rai shimet (jong u) naba un hap sngap ïa ka sur u paidbah, ka synjuk ki Rangbah Shnong, ki nongïalam shnong nalor kiwei-kiwei.
Haba pynsngew ba ki paidbah, kin sa mad bun ki jingeh lada hap sha Assam, utei u nongmihkhmat u la ong ba ki paidbah kin ym ïoh shuh ban long trai ïa ka khyndew ka shyiap naba kin hap ban siew khajna.
Ha kajuh ka por, u la ong ba ka riti ka dustur jong ki paidbah, ka riam ka beit, ka ktien ka thylliej nalor kiwei-kiwei ki sa shah ktah lut lada ki jaka hapoh ka Block-II kiba dang hap hapoh ka Raid Nongtung ki leit noh sha Assam.
“Kane kan wanrah jingeh ïa ki paidbah namar shisien ba phi la hap ha kawei pat ka Jylla, phin hap ban bud ïa kano-kano ka aiñ kaba kato ka Jylla ka pyntreikam,” u la ong.
Halor ka ‘Land Regulation Act’ jong ka Sorkar Assam, u la ong ba katei ka aiñ ka la kdew shai ba ym lah ban long trai ïa ka khyndew ka shyiap.
“Nga khmih lynti ba kane ka Sorkar bathymmai, MDA-II haba ka leh ïa kano-kano ka kam, ka dei ban sngap ïa ka sur jong ki nongïalam, nongsynshar shnong kumjuh ïa ka sur ki paidbah nongshong shnong hapoh ka Jylla,” u la ong.
Ha kawei ka liang, haba phai sha ka jingkhrong khajna jong ka Karbi Anglong Autonomous Council (KAAC) na ki nongrep synsar, u Bah Marngar u la ong ba u la dep kren ïa kane ka mat hapoh ïingdorbar bad na ka liang u Myntri Rangbah, u Conrad K. Sangma u la ai ka jingkular ba un ïakren bad ka Sorkar Assam kumjuh bad ka KAAC.
“Ngan ap ïa ka jubab kaba mih nangne la ka Sorkar ka ïakren ne em. Lada pynslem ïa ka jingïakren, ka jingkhrong khajna ka ïaid man ka sngi bad kane kan buh jingeh shi kat dei ïa ki nongrep jong ngi. Kawei ka Mahindra Pick-up ka hap ban siew T.15,000 kum ka khajna,” u la ong.
Shuh shuh u la bynrap ba u la ïakynduh ïa u CEM ka KHADC, Bah Titosstarwell Chyne uba la kular ïa u ba un thoh sha u CEM ka KAAC halor katei ka bynta.
“U CEM u la ai ka jingkular ban phah ïa ki briew ka tnad khlaw ka KHADC ban leit sha ki 4-5 tylli ki jaka ba ka KAAC ka la pynïeng ïa ki khyrdop ban khrong khajna,” u la ong.
