Ka Meghalaya High Court ha kine ki khyndiat sngi ka la thalaiñ ïa ka sorkar jylla halor ka jingbym lah ban peitngor ïa ki trok/kali kiba kit palat pud. Ha ka kaiphod jong ka sorkar ba la ai sha ka High Court, la pynpaw ba ki don kumba 16 tylli ki jaka thew kiba treikam ha baroh kawei ka jylla, bad ha u bnai ban wan, ka jingdon ki jaka thew kiba treikam kan kiew sha ka 23 tylli. Ka sorkar ka la pyni ba 19 tylli ki jaka thew ki treikam bad sa 4 tylli kin sa treikam hapoh ar taïew eiei. Ha kajuh ka por, ka ïingbishar ka la ong ba ha kiba bun ki bynta jong ka jylla khamtam ha ka thaiñ Pynursla, Shella, Dawki bad Nongstoiñ, ki don bun bah ki kali kiba kit maw bad shyiap haduh ban da dap smam, hynrei kam shym la don kano-kano ka jingpeitngor ïa ki.
Wat lada khlem don ki jaka thew, ka High Court ka la ong ba ka paw shai ba kum kitei ki kali, ha kaba don napdeng jong ki ki bym don tang ki nombor kali, ki kit palat pud. Hynrei ka la ong ba ki bor sorkar ki phai da kynriang wat haba ki don kum kine ki kali kiba kit shaba palat ban ïa kaei kaba la shah. Shuh shuh ka la ong ba ki don ki bynta khamtam ha Pynursla ha kaba la ïohi ba da ki hajar tylli ki trok ki pynïeng ha kajuh ka por, bad kine ki trok ki dei kiba thmu ban kit maw bad shyiap sha Bangladesh, bad lehse ym don wat tang kawei ka trok ruh kaba bud ïa ki kyndon. Ha kiwei pat ki jaka, ka High Court ka la ong ba ki don ki trok kiba kit palat pud ïa ki dieng. Ka la ong ba lehse ka lah ban don ka jingkylla ha ki kali kiba kit ïa ki mar ki mata namar la tap bha ïa ki, hynrei la suba ba kane ka jingtap ka dei tang ban ïoh buhrieh ïa u dewïong uba la kit bad ym dei eh ban pyntikna ba kan don ka jingshngaiñ.
Ka High Court ka la ong ba ki Superintendent of Police (SP) ha baroh ki distrik ki dei ban ïoh jingtip kaba shai bad dei ban hukum ïa ki ban peitngor ïa ki kali kiba kit palat pud wat lada donkam ïa ki ban don ha surok. Shisien ba la leh kumne, bad lada la lah ban pynsangeh ïa ki katto katne ki trok kiba kit palat pud bad ban ym shah ïa ki ban ïaid khlem da pynhap shwa ïa kato ka jingkit kaba tam, lehse kan pynlong ïa kiwei ki trok ruh kin hap ban bud ryntih ïa ki kyndon. Ka ïingbishar ka la pynpaw ïa ka jingsngewdiaw ba ka sorkar jylla ka khlem pat leh ïa kano-kano ka kam khraw ban peitngor ïa ka jingïaid ki kali kiba kit shaba palat.
Ka long shisha kaba sngewdiaw ba ka sorkar kam leh eiei halor ki trok/kali kiba kit palat pud namar kine ki dei ki daw bah jong ka jingjot ba khlem dei por jong ki surok ba la shna ha ka jinglut kaba da ki phew klur tyngka. Nalor ki surok, ka jingkit palat pud ka ktah ruh ïa ki jingkieng kiba la rim bad kiba la donkam ban maramot. Ngim tip kaei ka ban jia lada dkut noh ka jingkieng Umïam lane ka jingkieng Dawki namar kam don ka jingteh lakam kaba tikna ïa ki kali kiba kit palat liam ban ïa kaei kaba la shah. Ngim dei ruh ban sngewlyngngoh lada jia ba ki jingkieng bapher bapher kin mad ïa ka jingjulor kaba jur. Na ka liang ka High Court kam lah ban leit hi dalade ban peit kiei kita ki kali/trok kiba pynkheiñ aiñ da kaba kit palat ban ïa kaei kaba la shah. Ka dei ka kamram jong ka sorkar bad ki briew jong ka ban leh ïa kaba donkam.
Haba ïaid ha ki surok, ngi ju shem beit ïa ki trok kiba kit palat pud, hynrei ngim lap pat ïa kita ki briew jong ka sorkar ki ban bat ïa kita ki kali bad ban pynsangeh na kaba ïaid. Lada shu peit tang da ki khmat ruh la ithuh ba ki dei ki kali/trok kiba kit palat pud. Kumba la kdew hi da ka High Court, ka long kaba I triem ban peit khamtam ïa ki trok/kali kiba kit ïa ki maw bad lada jia eiei ha surok, ki kali kiba bud nadien kin mad jingeh bad jingjulor. Ha ka jingshisha, dei ban bat ïa kita ki kali bad ban phah pynhap noh ïa kaei kaba ki la kit palat pud bad ha kajuh ka por, ban daiñ da ka kuna kaba heh. Ki ’riew paidbah kim lah ban leh eiei namar ym shym la pynkup bor ne iktiar ha ki ba kin bat ïa ki trok/kali kiba kit palat pud. Ngin hap ban shu peit la ka sorkar kan pyntreikam ne em ïa ki jingbthah bad ki hukum jong ka High Court, bad lada ka sorkar kam sngap, ngim tip shuh kaei ka ban jia.
