Shillong, Ïaïong 02:
Namar ka jingsniew jong ka suiñ bneng, ym shym la lah ban pynïaid shakhmat ïa ka jingïalehkai semi-final hapdeng ka Meghalaya pyrshah ïa ka Nagaland ha ka lympung 1st North East Inter State Friendship Tournament, kaba la pynlong ïa ka Nagaland ban ïoh rung ei sha ka final namar ka jinglah ban leh bha ha ka group.
Kumba ka long, ka Meghalaya ka don ha ka kyrdan kaba ar ha ka Group A katba ka Nagaland pat ka don ha ka kyrdan kaba hajrong duh ha ka Group B; kumta namar kane, ka Nagaland ka la ïoh rung sha ka final, ha kaba kan ïakhun pyrshah ïa ka Manipur.
Ha ka sngi Saitjaiñ, kaba la buh ban pynlong ïa ki ar tylli ki jingïalehkai semi-final. Ha ka jingïalehkai semi-final kaba nyngkong, ka Manipur ka la lah ban pynliem noh ïa ka Sikkim da 4 wiket ha ka jingïalehkai kaba la pynhiar sha ka 35 over, hynrei ïa ka jingïalehkai hapdeng ka Nagaland kaba la ïoh ban tied tang 20.4 over pyrshah ïa ka Meghalaya la hap ban pynsangeh noh namar ka jingsniew ka suiñ bneng.
Kumta ha ka Sngi U Blei, kaba dei ruh ka ‘reserve day’, la pynlong biang ïa ka jingïalehkai hapdeng ka Meghalaya bad Nagaland, ha kaba ka Meghalaya ka la tied 168 run bad hap 9 wiket na ki 38 tylli ki over ba la pynduna. Ka Nagaland kaba la wan ban beh ïa kane ka thong, ka dang ïoh ban tied tang na ki kumba 9.1 over ha kaba ka la don biang ka jingpynthut na ka liang ka mariang, kaba khlem ailad shuh ïa ka jingïalehkai ban dang lah ban bteng, bad kumta ym shym la ïoh ïa ka nongjop namar ba la hap pynsangeh noh pura ïa ka jingïalehkai.
Ha kane ka lympung, ka Meghalaya ka la ïoh ban sdang ha ka rukom kaba biang da kaba pynliem noh ïa ka Arunachal Pradesh da phra wiket hynrei ban shah rem noh da 6 wiket ha ka jingïalehkai pyrshah ïa ka Manipur.
