Jowai, Ïaïong 02:
Ki 3 ngut kiba shah kem ha ki pulit ka Jowai Police Station halor ka jingsuba donkti ban pynïap ïa u Pynkhreh Surong uba na ka shnong Mynsngat mynta ki la don hapoh patok.
Kine ki 3 ngut ki dei u Meban Talang uba dei u para trai jong u I Love You Talang uba la shah pynïap ha u paidbhur ha khappud jong ka shnong Shangpung, u Sambun Dkhar bad u Jimmy Kyndait.
Hadien ba la kut ka jingtohkit ki pulit kaba san sngi, ki pulit ka Jowai Police Station ki la rah biang ïa kitei ki 3 ngut sha ïingbishar ha ka 2 tarik u Ïaïong bad ka ïingbishar ka la rai ban tian bishar ïa ki haduh 12 sngi hapoh ‘Judicial Custody’.
Kum ban shu pynkynmaw, ïa u Meban Talang bad u Sambun Dkhar ki pulit ki la kem ha ka 21 tarik u bnai Lber bad tang hadien shi sngi ba ki la shah kem, la lap ïa ka met ïap u Pynkhreh Surong na ka jaka khlaw ha Pommura kaba hap hapoh ka jingkhmih jong ka thanat Mawryngkneng.
Ha ka 28 tarik Lber, la ïoh kem ïa u Jimmy Kyndait uba na ka shnong Moorap.
