Hyderabad, ïaïong:
U Myntri Rangbah jong ka Telangana bad u heh nongïalam jong ka seng Bharat Rashtra Samithi (BRS) u K Chandrashekhar Rao u la pynbna ïa ka bailutksan kaba T. 10,000 ha ka shi akar na ka bynta ban thep sha ki Account jong ki nongrep halor ka jingshah pynjulor jong ki jingthung jingtep, la ong ka jingthoh ba la phah da ki heh sorkar.
U Myntri Rangbah u la phah da ki hukum ban nang ai shuh shuh ïa ki jingïarap pisa sha ki nongrep halor ki jingshah pynjulor jong ki jingthung jingtep na ka daw jong ka jingwan hap jong u slap bad u phria.
Ka jingwan hap jong u slap ha ka aïom ka bym dei ban hap ka la wanrah ïa ka jingduhnong kaba bun ha kine ki khyndiat sngi ba la leit ha kaba ka jingshah pynjulor jong ki jingthung ka la long ha ki 150,000 akar ki jaka kiba don ha kylleng jong ka Telangana.
Ki jingïakren ha kaba ïadei bad kiba bun ki mat kiba naduh ka jingpyntreikam ïa ki skhim bapher bapher la dep ban ïakren ha ryngkat ka jingdonlang jong u Chief Secretary u A Santhi Kumari bad kiwei pat ki heh sorkar, u Myntri Rangbah u la bthah ïa ki heh ba dei khmih ba kin pynbiang ka jingïarap pisa sha ki baduk na ka bynta ban shna ïing bad halor kiwei pat ki mat.
Na ka jingshah pynjulor jong ki jingthung jingtep na ka daw jong ka jingwan hap jong u slap bad u phria, u Myntri Rangbah dang shen u la leit ban jngoh bad ïaphylliew jingmut bad ki nongrep kiba la shah ktah jur na ka jingshah thombor ha ki bor ka mariang.
U Myntri Rangbah u la ong shuh shuh ba ki District Collector ki la dei ban pynlong ïa ka jingleit jurip bniah ha ryngkat ka jingdonlang jong ki Agricultural Officers (AEOs) hala ki distrik ba ki dei ban khmih bniah bad ban lum ïa ki jingtip kiba bniah halor ka jingdon jong ki jingshah pynjulor jong ki jingthung jingtep bad ban phah sha ka sorkar.
U Myntri Rangbah u la pynshai da kaba ong ba ïa kine ki pisa la dei ban phah beit beit sha ki Bank Account jong ki nongrep kiba ki jingthung jingtep jong ki ki la shah pynjulor na ka jingwan hap jong u slap bad u phria.
U Myntri Rangbah u la hukum ïa ki heh ba dei khmih ba kin sdang ïa ka bynta kaba ar jong ka Sheep Distribution Programme.
U Myntri Rangbah u la pynshisha da kaba ong ba ka jingthied ïa ki langbrot kan sa long hapoh ki hukum jong ki District Collector.
U Myntri Rangbah u la ong ba ka jingthied bad ka jingsam ïa ki langbrot ka la dei ban leh katkum ka jingpynïaid jong ki heh ba dei khmih. Shuh shuh u Myntri Rangbah u la hukum ïa u Chief Secretary u Santhi Kumari ba un shim ïa ki sienjam na ka bynta ban pynbiang ka jingïarap pisa kaba T. 3 lak sha kito kiba dei ban ïoh jingïarap na ka bynta ka jingshna ïa ki ïing ha ki jaka ba la mang na ka bynta jong ki.
U Myntri Rangbah u la pynshai da kaba ong ba ki jingpyntreikam ba la thmu ki la dei ban ïaid bad pynurlong.
U la ong ba shen kan sa don ka jingsam ïa ki kot dulir sha ki nongshong shnong kiba la dei ban ïoh ïa ki jaka ba la mang na ka bynta jong ki khnnang ba kin ïohlad ban shna ïa ki ïing ki sem jong ki.
