London, Iaïong:
U Arsene Wenger uba long uwei na ki nongialam (Manager) ba pawnam bha ha ka kam shakri ka jong u ha ka khana-pateng jong ka lympung ialehkai phutbol ka English Premier League, u lah shah pynrung mynta ryngkat lang bad u Sir Alex Ferguson sha ka “Premier League Hall of Fame”.
Kumta u Sir Alex bad u Arsene Wenger ki long ki nongialam ba nyngkongeh napdeng kiwei pat ki nong-ialehkai ban khur ia kata ka khusnam ba marwei bad ba pawnam da ka lympung ialehkai. Shuh shuh ruh u Arsene Wenger u la lah ban iai bat bad pyniaid ia ki kam ki jam jong u kum u nong-ialam jong ki kynhun ha ki 22 tylli ki aiom ialehkai kaba long ruh ka rekod ha ka EPL.
Ha ki por ki jong u, u Arsene kum u nongialam u la lah ban khur ia ki 3 tylli ki trophy EPL bad kynjoh ruh sha kawei ka nam kaba kham pher ha ka khana-pateng jong ka jingialehkai phutbol.
Ka kynhun ialehkai ka Arsenal ha ka aiom ialehkai 2003/04 ka lah ioh ban khur ia ka khusnam kaba khraw tam eh napdeng kiwei pat ki klob ha London naba ka long ka kynhun kaba iai sah kum ka bym shym la shah pynrem satia ha baroh kawei ka aiom ialehkai.
Kumta kata ka kynhun ialehkai ba paw jong katei ka klob ka kynthup ia u khlur ialehkai kum u Thierry Henry, Robert Pires, Freddie Ljungberg, Dennis Bergkamp, Ashley Cole, Gilberto Silva, Sol Campbell bad Patrick Vieira. Hynrei ka jingiaid lynti jong u Wenger ha ka klob ka lah nang iai tyllun shakhmat haduh ba un da lah ban pynneh halade ia ka kam shakri jong u shaduh ki 828 tylli ki jing-ialehkai ha ka EPL kaba kynthup ia ki 476 tylli ki jingjop bad 199 tylli ki jingiakhaid. Dei ha ki aiom ialehkai jong u snem 1998, 2002 bad 2004 ba u Arsene Wenger u lah shah jied kum u ‘Manager of the Season’.
Kumta ha baroh shi lynter jong ka kam shakri ka jong u kum u nong-ialam ka Arsenal, u Wenger u iai sah iai long u briew uba khuid bad uba shida ia ka klob baroh kawei bad kumjuh ruh ia ki paidbah nongkyrshan ba shitrhem jong ka klob ha kylleng ka pyrthei.
Na ka bynta ban shah pynrung ka kyrteng sha ka nam “Hall of Fame” ka long ka jingangnud bad ka jingphohsniew na ka bynta kiba bun ki nongialam (Managers).
Hynrei ka jingnoh synniang jong u Arsene sha ka kam ialehkai phutbol ka lah long kaba seisoh bad ha kaba bun na ki nongialam jong ki klob bapher bapher ki phaikhmat beit tang sha u wat hadien ba u lah pynbna ba un shongthait noh na ka kam.
