Belgrade, Iaïong:
Na ka liang jong ki nongpyniaid bahakhliehduh jong ka lympung ialehkai Tennis ba pawnam bha ka ri Bilat ka Wimbledon, ki iathuh ba ki nongialehkai ba pawkhmat jong ka ri Russia bad Belarus ki lah ioh mynta ia ka jingbit na ka bynta ba kin ia aireng ha ki jingialehkai jong katei ka lympung ialehkai mynta u snem.
Katei ka jingioh jingbit ka jong ki ka long hadien ba lah weng noh ia ka jingshah khang ialehkai jong ki nongialehkai kitei ki ar ri ha u snem 2022.
Kumta ki nongialehkai jong kitei ki ar ri ha ka lympung kin long ruh kiba bit na ka bynta ban rung sha ka rynsan iakhun Grand Slam ha u bnai Naitung, lada kita ki nongialehkai ki ia aireng kum ki kyrtong bym shym la don liang sha kano kano ka ri bad ki ban bud ryntih ruh katkum ki kyndon ba lah buh.
Shuh shuh ruh ka khubor ka iathuh ba kitei kijuh ki kyndon kin treikam ruh ym tang ha katei ka lympung ialehkai ka ban sa long hynrei wat ha kiwei pat ruh ki lympung ialehkai Tennis ba pawnam ka ri Bilat.
Katei ka rai ka long ruh ka kam kaba eh shibun na ka bynta ki nongpyniaid ka lympung ban poi sha katei ka bynta, ha ryngkat ka jingbym shym la khein sting ne khlem kano kano ka jingkhein shngain na ka bynta kito ki nongialehkai kiba iohlad ban shimbynta ha ki lympung ialehkai.
