Shillong, Ïaïong 03:
Ka Meghalaya Chess Association ka la sdang ïa ka lympung ïalehkai chess ba la tip kum ka 1st Meghalaya Invitation FIDE Chess Tournament 2023 ha ka Lah Sngi U Blei ha Sri Aurobindo Institute of Indian Culture, Shillong.
Kane ka long ka sien kaba nyngkong eh ba kane ka synjuk ka la pynlong ïa kane ka lympung ïalehkai kaba san sngi lynter kaba la wan ïashim bynta da 96 ngut ki nongïalehkai na ki saw tylli ki jylla jong ka thaiñ shatei lammihngi kiba kynthup na ka Assam, Arunachal Pradesh, Manipur, Tripura bad 40 ngut kiba na Meghalaya.
Ïa kane ka lympung la plie da u Myntri ka Sorkar Jylla u Bad Alexander Laloo Hek ha kaba la ïadonlang u Joint Secretary ka Jylla u Gunanka D. B (IFS), kumjuh u President ka MCA Bah K. M Warjri, u General Secretary Bah Khrawkupar Pajat, ki dkhot kane ka synjuk, ki nongïalehkai bad kiwei kiwei.
Ha kane ka lympung la wan ïashim bynta da ki nongïalehkai na kylleng ka thaiñ shatei lammihngi kiba kynthup ïa ka Meghalaya bad la pynkhreh ruh ïa ki khusnam ba T. 1.50 lak na ka bynta ki nongjop.
Haba ai jingkren ha kane ka sngi plie u Bah Hek u la ong ba ka jingïalehkai Chess ka long kaba donburom bad ka long syrïem bad ka jingïalehkai tied golf namar ki nongïalehkai ki dem la ki khlieh haba ki ïalehkai. “Wat la nga don jingtip khyndiat ïa kiwei kiwei ki jingïalehkai kum ka football, badminton, golf bad kiwei, hynrei ngam don jingtip eiei ïa ka rukom ïalehkai chess.” u la bynrap.
Ha kawei pat ka liang u Bah Warjri u la pynpaw, “Kane ka long ka sien kaba nyngkong eh ba ka jylla Meghalaya ka la ïoh ban pynlong ïa kane a lympung. Kumta nga khmih lynti ba baroh ki nongïalehkai jong ka thaiñ shatei lammihngi kin ïoh jingmyntoi lyngba kane ka lympung.”
Nangta u la ïathuh ba shen yn sa pynlong ïa ka North East Chess Tournament ha Arunachal Pradesh. “Te kumta nga khmih lynti ba ki nongïalehkai kin ïalehkai bha ha ka Meghalaya Invitation khnang ba kin ïoh ïa ka lad ban leit ïashim bynta ha Arunachal.”
Shuh shuh u Bah Warjri u la ïathuh ba ka Jylla kan ïoh ruh ban pynlong ïa ka International Grand Master Tournament ha kaba la thmu ban pynlong ha u snem ban wan. “Ngi khmih lynti ban pynlong ïa kane ka lympung hadien ba la kut ki eksamin bapher bapher. Ka jingpynlong ïa kane ka lympung kan long ka jingïarap ban kyntiew ïa ki khynnah ïalehkai ka jylla bad kumjuh ïa ka thaiñ shatei lammihngi hi baroh kawei.
“Ka jylla kan ïoh ruh ban pynlong ïa kiwei pat ki lympung ïalehkai na ka bynta ki skul. Nga sngew ban ong ba kan long ka jingplie lad ïa ki khynnah kiba dangrit ba kin ïoh ban ïashim bynta ha ki lympung ïalehkai bapher bapher.”
