Mawkyrwat, Ïaïong 03:
Ka KSU Mawkyrwat Circle ha ka Lah Sngi U Blei ka la pynkup burom da ka khusnam Maitshaphrang Achiever’s Award ïa ki arngut ki rangïalehkai phutbol kiba la wanrah nam bad burom ïa ka distrik bad ka jylla hi baroh halor ka jingïadon bynta jong ki ban mihkhmat ïa ka kynhun ïalehkai phutbol ka jylla ha ka 76th National Football Championship Hero Santosh Trophy 2022-23 kaba la long ha ka nongbah Riyadh Saudi Arabia.
Kine arngut samla kiba la shah pynkup burom ki long u Wanboklang Lyngkhoi na ka shnong Marshilong bad u Manbhakupar Ïawphniaw na Mawkyrwat.
Ka jingpynkup burom ka seng ïa kine ki samla ka long kum shi bynta ban pynshlur bad ai mynsiem shuh shuh ba kin nang trei shitom bad nangkiew ha ka kam ïalehkai. Ha kajuh ka por kane ka long ruh kum ka jingai mynsiem ïa kiwei pat ki khun samla ka dong ka thaiñ kiba don ïa ka sap ka phong.
Ha kane ka sngi pynkup burom la ïadonlang kiba haïing hasem kine ki samla ryngkat u sam Pauldeep Tongwah, President KSU Mawkyrwat Cicle, samla Rutherford Lyngdoh Secretary, samla Teiborlang Kharwanñiang, Organising Secretary, Samla Evansroy Nongrem, Education Secretary KSU SWKHD bad kiwei kiwei.
