Melbourne, Iaïong:
U khlur ialehkai pynmareh kali ka ri Netherlands u Max Verstappen u la lah ban khur noh shalade ia ka khet jingjop na ka AGP (Australian Grand Prix) hadien ki ar tylli ki lama-saw ba la kaweh bad ka jingiatyngkhuh kali ruh kumjuh ka lah pynlong ia ka lympung baroh kawei sha ka jingiakular jingmut jong ki nong-ialehkai bad ha shuwa ba u Max un ioh jingbit na ka bynta ka Processional Victory Lap ha baroh kawei ka madan ialehkai jong ka Albert Park.
Ha kata ka jingiakhun, u Verstappen u la lah ruh ha ka ban pynher shakhmat ia ka kali jong u bad ban tam noh ia u khlur ialehkai ba paw ka kynhun Mercedes u Lewis Hamilton ha ka por ba u Kevin Magnussen u lah leit ban tynrah ia kali jong u sha ka kynroh ha kaba lah hap ki lyngkhot-lyngkhai ha madan ialekai bad ka jingpynsangeh shipor ialehkai jingialehkai. Ha ka jingsdang biang ia ka jingiakhun, u nongniah ka Williams u Logan Sargeant u lah bud nadien jong u Nyck de Vries ka AlphaTauri na ka bynta ban pynliem ia baroh arngut ha ka jingiakhun. Shuh shuh ruh u nongniah ka Alpine u Pierre Gasly bad Esteban Ocon ki lah iatyngkhuh kali paramaki.
Hadien ka jingailad biang ban pynlong sa shisien ia ka jingiakhun, ka long ruh ka lad ka lynti na ka bynta u Max Verstappen ban khur ia katei ka khet jingjop kaba ar sien jong ka aiom ialehkai ba mynta kata shakhmat ia u Hamilton ha ryngkat bad u nongniah ka Aston Martin u Fernando Alonso ha ka kyrdan balai.
Kumta ruh ka kynhun Red Bull mynta ka lah khur ia baroh ki lai tylli ki jingjop Grand Prix ha ka aiom ialehkai ba thymmai kaba long ruh ka rekod jong ka kynhun ialehkai kaba lah wanphai biang sha ka jinglong bahalor bad ka jingioh biang sa shisien ban pyniaid ia ki lympung ialehkai.
Ka khubor ka iathuh ruh ba u Max mynta u don ia ki 69 dor-thong ha ka jingiakob ialehkai da kaba tam shakhmat mynta da 15 ia u nongialehkai ba na kajuh ka kynhun u Sergio Perez.
Ka Red Bull ha ki 123 dor-thong ki jong ka, ka lah plie ruh ha ka kynhun ia ka lad kaba heh ha ka jingtam bha jong ka shakhmat ha ka Constructors Championship da kaba iehnoh shadien ia ka kynhun kaba wan ba-ar ka Aston Martin (65) bad ia ka kynhun kaba wan balai ka Mercedes (56).
