London, Iaïong:
Ka khubor ba la ioh lum ka lah pynkyndit ia kiba bun ki nongkyrshan ba shitrhem jong ka klob Chelsea ha ka lympung EPL ha kaba na ka liang jong ki nongpyniaid bahalor katei ka klob ki lah sloit noh mynta ia u Graham Potter uba dei Manager jong ka klob. Kane ka wan jia hadien ba ka kynhun kam shym lah ban ialehkai bha ha ki jingiakhun ba la dep bad buh ruh ia katei ka kynhun ialehkai ha ka jaka ba 11 ha ka miej khein dor-thong jong ka lympung.
U Potter u la wan ban pyniasoi bad ka klob kum u nongialam jong ka kynhun da ka jingshimti ki trai ba thymmai jong ka klob ha u Nailur. U la ioh ruh ia ka jingiaroh na kita ki trai jong ka klob da kaba khwai noh ia u na ka klob Brighton & Hove Albion, hynrei u ioh ban pyniaid tang ha ki 31 tylli ki jingialehkai bad khur pynjop tang 12 sien ia ka kynhun ha ki jingiakhun, kata ha shuwa ba ki trai jong klob kin shim ia katei ka sienjam kaba mynta pyrshah ia u.
Ka jingpyniaid ba khatduh ka jong kum u nongialam ka kynhun ka lah long ha ki khyndiat sngi ba lah leit noh ha ka jingiakhun pyrshah bad ka Aston Villa; ha kaba katei ka kynhun ialehkai ka jong u ka lah mad ia ka jingshah pynliem noh da 2-0 kol ha ka jingia aireng jong ka ha-iing.
Ha ka por ba u dang iai don bad ka kynhun baroh kawei, u Graham u la lah ban rah ia ka klob baroh kawei sha ka jingiakhun quarter-final jong ka Champions League; ha kaba katei ka kynhun kan pynkhreh ban iakhun pryshah ia ka Real Madrid.
Kumta da ka jingshah sloit noh ka jong u na ka kam na ka liang jong ki nongialehkai ka klob ki kwah ban ai ka jingkhublei kaba kyrpang sha utei u nongialam halor baroh ki jinglah jong u ha ka ban btin ia ka klob baroh kawei bad ka jingnoh synniang jong u ha ki kam ialehkai da kaba pyntyllun hok ia ka shalyntem jong u kum uta u nongialam ka kynhun.
Hadien ka jingsloit noh da ka klob ia utei u nongialam u jong ka kynhun, na ka liang jong ki nongpyniaid bahalor ka klob ki pynbna ruh ia ka kyrteng jong u Bruno Saltor u ban sa shimti kum u nongpyniaid ba shipor jong ka klob tad haduh ban da ioh pynskhem da u briew uba biang ha ka ban pyntyllun ia ki kam ba dangsah ha ka klob.
