New Delhi, ïaïong:
Ka long ka khubor jong ka jingduh kaba khraw ia ka kynhun ialehkai rah-nar jong ki kynthei ka ri naba kawei na ki nongialehkai kaba lah khur haduh arsien ia ka nam kum ka lahduh ha ka Commonwealth Games ka Sanjita Chanu ka lah shah pynshitom ha ka National Anti Doping Agency (NADA) da ka jingshah sospon ialehkai haduh saw snem halor ka jingbym shym lah jong katei ka nongialehkai ban jop ne ban pas ia ka jingshah peitbniah ha kaba iadei bad ka kam dih droks ha u snem ba lah dep.
Nangta, ka khubor ka iathuh ruh ba ka jingbym shym lah jong katei ka nongialehkai ban jop ia katei ka jingshah peitbniah ka long hadien ba lap ba ka nongmuna jong ka ka don ia u dawai ba la khang pyrshah da ka WADA u Drostanolone Metabolite. Katei ka jingjia ha ka por ba ka dang pynlong ia ka jingpeitbniah sha ki nong-ialehkai katba dang long ka lympung ialehkai ha ka National Games ha Gujarat kaba sdang naduh u Nailur haduh u Risaw. Da katei ka jingleh jong katei ka nongialehkai ka la ktah shibun ia ka kam ialehkai naba hap ban shah sloit noh ka takma Rupa ba ka khur na ka National Games.
Kum ban shu pynkynmaw hangne ka long ba ka Sanjita ka lah dep ban khur ruh ia ka takma Ksiar na ka 48kg da kaba tam noh shakhmat ia ka Mirabai Chanu ha ka 2014 Commonwealth Games ha Glasgow.
Ha ka CWG 2018 kaba lah long ha Gold Coast, katei ka nongialehkai ka lah shah pynkup da ka khet kum ka lahduh ha ka kyrdan iakob rah-nar 53kg. Halor katei ka jingshah sospon ka jong ka mynta, katei ka nongialehkai na ka jylla Manipur ka dang don ia ka lad na ka bynta ban buh ia ka jingkyrpad ka jong ka halor katei ka rai pyrshah ia ka, hynrei ka long pat ka bym pat thikna la kan leh ne em ia katei ka bynta. Kam shym la long ruh ka sien kaba nyngkong ba ka tei ka nongialehkai ba pawnam ka ri bad ka nongkhur takma Rnong ha ka 2011 Asian Championship ba kan shem halade ha ka jingshah pynngop ha ka kam dih droks. Ka long ruh ka nongialehkai kaba lah shah sospon ruh ha ka International Weightlifting Federation (IWF) ha u snem 2018 hadien ba la lap ha ka ia ka jingpyndonkam ia u dawai da kaba shu injek ha ka met ha shuwa ba kan shim bynta ha ka World Championships kaba lah long ha u snem 2017 jong u bnai Naiwieng ha USA.
