Shillong, Ïaïong 04:
Ka Tura District Cricket Association ka dang tam da 9 run ha ka inning ba nyngkong pyrshah ïa ka Shillong Cricket Association-A ha ka sngi kaba nyngkong jong ka final ha ka U-15 Inter District Cricket Tournament 2023 ha ka Sngi Ba-ar ha Umbuda, Ri-Bhoi.
Kane ka jingïakhun ban ïaknieh ïa ka nam lahduh kan long hapdeng ki ar tylli ki kynhun ba kynsai jong kane ka lympung ba la pynlong da ka Meghalaya Cricket Association. Hynne ka sngi la lah ban ïalehkai bha da ki nongkawang bol kiba la lah ban pynhap haduh 23 wiket.
Haba shimti ban tied nyngkong, ka SCA-A ka la kamai 101 bad ka TDCA ka la lah ban tam da 9 run hadien ba shah pynkhyllem baroh ki nongtied na ka bynta ban kamai 110 run.
Hynrei hadien ka SCA-A ka la kynjoh sha ki 46/3 ha ka inning ba ar na ka bynta ban pynlong ïa kane ka kynhun ban tam 37 run.
Ki la don lai ngut ki nongtied ka SCA-A kiba kynthup ïa u Dipayan Nandi uba la ïoh 48 run na ki 47 bol, u Advay Ratan Surana (21) bad u Rudra Singh Rathor (16).
Wat la ka SCA-A ka la pyrshang ban ïalehkai bha, hynrei ki nongkawang bol ka Tura ki la lah ban pynhap wiket kiba kynthup ïa u Ben Haden N. Marak (4/22) bad u Silgrim B Marak (4/33).
Kumjuh ki nongkawang bol la SCA-A ki la ïakhun tyngeh ha kaba u Gaurav J. Thakuria (5/42) uba la khur 5 wiket, katba u Rohit Sharma (3/10) u la khur 3 wiket. Katba u Silgrim u la long u nongtied uba la ïoh bun da kaba kamai 32 run na ka bynta ka TDCA katba u Ben Haden u la ïoh 29 run na ki 17 bol. U Agatchu Chetai K. Marak u la ïoh 28 run.
Hadien ka SCA-A ka la kynjoh 18/3 ha ka inning ba ar, hynrei u Nandi sa shisien pat u la lah ban ïalehkai bha na ka bynta ban long uba khlem shah pynhap wiket bad ban kamai 25 run na ki 20 bol na ka bynta ban pynlong ïa ka kynhun jong u ban kynjoh sha ki 46/3 bad ban bteng biang ïa ka jingïakhun kaba khatduh ha ka Sngi Balang.
