Shillong, Ïaïong 04:
Ka Shillong Lajong Football Club (SLFC) ka la khur ïa ka jingjop kaba nyngkong ha ka lympung ïalehkai Second Division League, hadien ba ka lah ban pynliem noh ïa ka East Bengal da 1-0 kol ha ka Sngi Ba-ar ha Naihati Stadium kaba ha Kolkata.
Kane ka nam jop ka la wan urlong lyngba ka shi kol ba la thep da u rangïalehkai shapdeng u Pursunep bad u Sambor Kharsahnoh u la ïohpdiang ïa ka nam ‘Player of the Match’ ha kane ka jingïalehkai.
Ha kane ka jingïakhun, u coach ka SLFC u Bah Bobby Lyngdoh Nongbet u la pynmih madan ïa saw ngut napdeng ki san ngut ki rangïalehkai, kita u Babysunday Marngar na ka bynta u Chanmitre Thma ha ka kylla step bad ïa lai ngut kiwei pat hadien ba ka la ïoh thep kol. Kine ki kynthup ïa u Everbrightson Mylliempdah na ka bynta u Amon Lepcha, Wadajied Kynsai Ryngkhlem na ka bynta u Hardy Cliff Nongbri bad ïa u Ïohborlang Lyngdoh Lyngkhoi na ka bynta u Pursunep.
Kumba ka paw na kane ka jingïalehkai kaba nyngkong, baroh ar kynhun ki la pyni ïa ka jingïakhun kaba ïakhaid bha naduh kaba sdang ha kaba ka la pynlong ïa ki ba kin ym lah ban thep kol ha ka kylla step.
Dei ha ka kylla miet ba u Pursunep u la ïoh ban pynkhih jar ha ka minit kaba 50. Kane ka shi kol ka la nang pynïoh mynsiem ïa ki rangïalehkai ka SLFC ban ïakhun tyngeh shuh shuh bad kumjuh ruh ka East Bengal kaba donkam ban pynphai.
Haduh kaba kut ka jingïalehkai, katei ka kynhun ïalehkai jong ka Indian Super League na Kolkata kam shym la lah ban pynurlong bad ka la mad ïa ka jingshah rem kaba nyngkong ha kane ka lympung. Da kane ka jingjop, ka Lajong ka la khur ei ïa ki lai dor-thong (point) na kane ka jingïakhun kaba nyngkong jong ka Group-B.
Kumta ka Lajong kan pynkhreh ïa ka jingïakhun ba ar pyrshah ïa ka Diamond Rock ha ka Sngi U Blei (9 tarik) ha Balaghat, Madhya Pradesh. Ka Diamond Rock ka la mad ïa ka jingshah rem ha ka United SC da 2-0 ha ka Sngi Ba-ar ha Kolkata.
Ha kane ka lympung ki la don haduh 19 tylli ki kynhun bad la phiah ha san tylli ki group. Dei tang ka group-B kaba don tang saw tylli ki kynhun, katba kiwei pat ki don san tylli. Ki kynhun ki ban wan ha ki kyrdan ba hakhlieh kynthup ïa ki kynhun ba kynsai ki ban wan ha ka kyrdan ba-ar kin ïoh rung sha ka wat kaba khatduh na ka bynta ban ïaknieh rung sha ka I-League.
