Czech Republic, ïaïong:
Na ka liang jong kawei na ki khlur ialehkai Tennis ki kynthei kaba long teng kum ka lahduh Wimbledon haduh arsien kynthih ka Petra Kvitova na Czech Republic ka iathuh ba ka lah pyrshah ia ka rai jong ki nongpyniaid bahalor ka All England Club Wimbledon Open halor ka jingshah bad ailad ka jong ki mynta ia ki nongialehkai shynrang bad kynthei ka ri Russia bad Belarus ba kin shimbynta ha katei ka lympung ialehkai jong une u snem ba mynta.
Shuh shuh ruh kum ban shu pynkynmaw biang mynta ka long ba u snem ba lah leit noh katei ka lympung ka lah khang pyrshah ia ki nongialehkai na kitei ki ar ri ba kin mih madan ha ki jingialehkai ha ka lympung hadien ba ka ri Russia ka lah hiar thma pyrshah ia ka Ukraine bad ruh ba ka Lawn Tennis Association ka lah khang bad ym shah ia ki nongialehkai jong kitei ki ri wat ban shimbynta ha kiwei pat ki lympung ialehkai Tennis ha ri UK. Kumta ruh ki nongia aireng na kitei ki ar tylli ki ri kin sa lah mynta ha ka ban rung ha une u snem ba mynta sha ka tei ka lympung iakhun Grand Slam ka ban sa long ha u bnai Naitung; lad akita ki nongialehkai kin ia aireng ha ka lympung kum ki “Neutral Athlete” bad ruh ba kin hap ban bud ryntih ia ki kyndon ba lah buh hakhmat ki nongialehkai. Na ka liang jong ka tei ka nongialehkai ka pynpaw ia ka jingsngewnguh ia katei ka lympung kaba lah mad ia ki jingeh babun ha u snem ba lah dep; khlem ki dor-thong hadien ba ki nongialehkai na ki tei ki ar ri kim shym la ioh ban ialehkai. Na ka ling jong ka Kvitova ka pynpaw ruh ka jingsngewkhia halor ka jingdonbyntalang mynta da ki nongialehkai jong kitei ki ri wat ha ka lympung ialehkai Olympic ruh kumjuh; naba ka lympung hi baroh kawei kam kwah satia ban don kano kano ka thma ha ka pyrthei.
Na ka liang jong ka All England Club kaba ju iai pyntyllun ia ki kam ki jam jong katei ka lympung ialehkai Wimbledon, ka pynpaw ba ka rai halor ka tei ka bynta ia kaba lah shim mynta ka long hadien ba lah dep ban iakren bad mir jingmut bad ka sorkar UK, Lawn Tennis Association (LTA) bad kiwei pat ki synjuk pyniaid jingialehkai Tennis ha ka pyrthei.
