United States, ïaïong:
Lehse kan long ka khubor ka ban pynsngewtynnad ia ki paidbah nongpeitkai bad nongkyrshan ba shitrhem na kylleng ki ri ka pyrthei jong ka lympung World Wrestling Entertainment (WWE) bad ruh jong ka Ultimate Fighting Championship (UFC), ha kaba naduh mynta hi kin sa sakhi noh ia ki jingialehkai jong ki ar lympung tang ha kawei ka bynta da ka jingiasnohlang jong kitei ki ar lympung ialehkai na ka bynta ka jingthaw thymmai ka jong ki ia ka jingiaid lynti bad ka jingpynbna paidbah kum ki karkhana kiba pawnam tam eh ha ka pyrthei ba kin ialong noh kawei ha kane ka kynti ba mynta.
Shuh shuh ka khubor ka iathuh ruh ba ka jingpoi jong kitei ki ar lympung ialehkai kiba heh sha ka jingiasngewthuh jingmutlang na ka bynta ban ialonglang noh tang kum kawei ka lympung ialehkai ka long hadien ka jingiakut iasoi ka jong ki kaba haduh da ki phew million-dollar ia kaba lah dep ruh ban pynskhem bad pynthikna ha shuwa ban pyllait paidbah.
Kumta ka Endeavor Group Holdings, kaba long ka nongpyniaid bahalor jong ka lympunhg ialehkai UFC, ka pynbna paidbah ba kan pyniaid bad bat halade ia ka 51 % ha ka ban pyntyllun ia ki kam ki jam ki jong ka ha kata ka kompani ba thymmai ha ka jingialong kawai; katba ki nongiasambyntalang ha ka jingpyntyllun ia ka lympung WWE ha kane ka pateng-pakit kaba mynta, kin bat halade ia ki 49 %.
Kumbpaw ka paw ruh ba ia ka WWE la long trai bad pyniaid ia ki kam ki jam baroh jong ka lympung da u heh spah ba pawnam ha ka pyrthei u Vince McMahon, ha kaba u lah paw pyrthei bad pynbna ruh ia katei ka jingiateh soskular mynta, ha kaba ka WWE kan shongdor mynta ha ka dork aba $9.3 billion katba ka UFC ia kaba lah long trai da ka Endeavor ka shongdor mynta ha ka dor kaba $12.1 billion.
Hynrei kumba ka long haduh mynta-mynne hi, u Vince McMahon u dang iai pyntyllun ia ki kam ki jam ki jong u kum u nongpyniaid bahakhliehduh jong ka WWE katba u Dana White u dang iai long u nongpyniaid jong ka UFC. Kumta katei ka jingiateh ba thymmai ka lah ruh ban ktah ia ki kyrdan jong baroh arngut ka jinglong jingman ka jong ki, hynrei ym shym la don kano kano ka jingpynthikna ia kaba yn pynpaw ha kaba iadei bad kano kano ka jingpynkylla.
Na ka liang jong u CEO ka Endeavor u Ari Emanuel u iathuh ruh ba kane mynta ka long ka lad ka lynti kaba khampher shibun ha ka kam ialehkai ha ki jingialehkai, ki tamasa pynsngewtynnad paidbah ban poi mynta sha katei ka thong. Kumta ka jingialong-lang kawei mynta bad ka WWE khlem pep kan sa wanrah ia ka jingiohnong shuh shuh na ka bynta ki nongiasambynta bad ka jingiohnong ruh na ka bynta kitei ki ar lympung ialehkai ba pawnam.
Ka khubor ka iathuh ruh ba 11 ngut ki dkhot jong ka BoD (Board of Directors) ha kaba 6 ngut lah jied da ka UFC bad 5 ngut pad da ka WWE yn sa pynbna ia ki kyrteng jong ki hadien bad ki ban sa ioh ruh ia ka jingshah pynkhmati na ka bynta ka jingkitkhlieh ka jong ki ha kaba iadei bad katei ka atiar ba thymmai jong kam ialehkai.
