England, ïaïong:
Kan long ka jingduh kaba khraw na ka bynta ka klob ialehkai phutbol ha ka lympung EPL ka Fulham ha ki jingiakhun ki ban dang wan naba uwei na ki nongshut bol ba tbit jong ka u Aleksandar Mitrovic u lah shah pynngat ha ka jingpynshitom da kaba shah pynduh ialehkai haduh phra tylli ki jingialehkai ki ban wan. Kane ka long hadien ba utei u rangialehkai u lah ktah-kti bad khynniat ia u nongput bisil (Referee) uba lah pyniaid ia ka jingiakhun quarterfinal jong ka lympung ialehkai FA Cup; wat hadien ba katei ka kynhun ka lah mad ia ka jingshah pynrem noh ha ka kynhun iakhun pyrshah ka Manchester United ha ka jing-iakhun jong ki ha u bnai ba lah dep.
Shuh shuh ha kaba iadei bad katei ka bynta, u tei u rangialehkai bar-ri ka Serbia u lah shah sei beit-beit Shabar jong ka madan ialehkai lyngba ka jingshah sei Red Card ka jong u halor katei ka jingleh ka jong u pyrshah ia u Chris Kavanagh hadien ba u Chris u lah rai da ka penalty halor ka jingktah da ka kti ia ka bol da uwei na ki rangialehkai phutbol ka Fulham u Willian. Kumjuh ruh katei ka klob ka lah mad ruh ia ka jingeh kaba khraw hapdeng jong ka jingiakhun, ha kaba u nongialam ka kynhun u Marco Silva u lah shah sei da ka Red Card katba ka jingialehkai ka dang iaid bad u ban duh noh ruh ha ka ban iadonlang bad ka kynhun ha ki ar tylli ki jingiakhun kiba hadien. Haba phai sha ka tei ka jingiakhun, ka kynhun ialehkai u Silva ha kaba nyngkong ka lah ioh ban tam kol shakhmat ia ka Man U da 1-0 ha ka por ba u nongpyniaid ka jing-ialehkai u lah sei ia kitei ki Card hapdeng jong ka jing-ialehkai, hynrei katei ka kynhun watla ka la la ha ka ban tam da shi kol ia ka kynhun pyrshah pynbna ka mad pat ia ka jingshah pynrem noh ka jong ka da 3-1 kol ha kata ka jingleit iakhun jong ka sha Old Trafford.
Nalor ka jingdep ban ioh lypa ia ki lai tylli ki jingshah pynduh ialehkai da u Mitrovic, utei u rangialehkai u lah ngat shuh shuh ha katei kajuh ka shrip sa da lai tylli ki jingialehkai namar katei ka jingktah kti jong u pyrshah ia u nongpyniaid ka jingialehkai bad shuh shuh ruh sa ar tylli ki jingpynshitom namar ka jingpyndonkam jong u ia ki kyntien ki bym dei, jingkren heh, bad ka jingbyrngem-byrsit pyrshah ia u nongpyniaid. Kumta na ka liang jong utei u rangialehkai u lah pdiang ruh ia katei ka jingshah pynshitom kaba mynta ha ryngkat ruh bad ka jingshah dain kuna kaba £75,000 ($93,000). Ka jingshah pynduh ialehkai u Mitrovic ka long ha ka por ba ka kynhun ka shah pynliem noh da 2-1 kol ha ka Bournemouth bad katei ka jingshah pynshitom kan nang iaisah haduh ba ka kynhun kan iakynduh pyrshah ia ka Southampton ha ka 13 tarik u bnai Jymmang 2023.
