Nongstoiñ, Ïaïong 05:
Wat la ka sor Nongstoiñ ka dei kawei na ki jaka sor kiba la kham paw lane bna nam bha, lehse wat ha ka Jylla hi baroh bad kaba long ruh ka jaka kaba dei ka nongbah jong ka West Khasi Hills District, hynrei haba phai mynta kane ka sor ka dang don bun ki jingduna ha ka liang ki kam pynroi naba wat ki lynti ïaid kjat harud surok kim pat biang satia.
Ka jingbym biang jong ki lynti ïaid kjat ha ki katto katne ki bynta jong ka surok bah ha sor Nongstoiñ ka la wanrah shisha ka jingeh ha ka ïaid ka ïeng bad khamtam lei kaba buh jingma ïa ki khynnah skul, ki khunlung khynnah kiba ïaid lyngba khamtam na ka surok na jingkieng Nonbah sha ka skul Anderson nangta na jingkieng Nonban shaduh ka skul St. Saviour.
Halor kane ka mat lane ka bynta bad ka jingbym don ki lynti ïaid kjat (footpath) ha baroh arliang ka surok ha kitei ki jaka, ym tang ba ka pynthut ïa ka leit ka wan jong ki briew ban kiar na ki kali, hynrei ka buh jingma ïa ki khynnah rit, ki khunlung ba ïaid ha katei ka surok khamtam ïa ki khynnah skul ha ka por mynstep bad janmiet ynda ki la wai skul.
Halor kane ka jingeh bad jingma kaba ap ïa ki khynnah skul, ka seng Hynñiewtrep National Youth Movement (HNYM) West Khasi Hills ha ka jingïalam jong u President ka West Khasi Hills u samla Tailanstar Lyngkhoi ka la ïoh ban leit kynduh syndon ïa u Deputy Commissioner ka West Khasi Hills District u Bah Garod LSN Dykes IAS bad buh syndon da ka jingthoh.
Na ka liang ki nongïalam ka seng ki la ong ba ha ka jingleit ïakynduh ïa u Deputy Commissioner, na ka liang jong u, u la kular hakhmat ba un peit bniah halor katei ka bynta bad ban shimkhia ban pynïoh ïa ki lynti ïaid kjat ha kitei ki jaka ba idonkam bad kaba buh jingma ruh ïa ki nongïaid nongïeng, ki khynnah skul bad ki khunlung khynnah.
