U Sumar Sing Sawian
Mask ha ka kyntien Phareng ka mut kaba buhrieh ia la ka khmat da kaba deng da ka BULA. Kumta lada uno uno ne kano kano ka briew, ba la shoh u Khaw – iang, ka da kylla ka dur khmat. Kum ia kita ki briew ba la shoh u Khaw – iang, ki ong ba u la BULA. U don pat sa uwei u jaid Khaw, kaba kit jingmut ha ka kyntien Phareng – Mesmerise, kaba mut ba la shah pynbiej, haduh bym tip briew shuh ne don shuh ka jingsngewthuh. Kaba lah ruh ban ong ha ka jingshah pynshoh jadu. Kumta ka kyntien Khasi jong ka MESMERISE, ka dei SHOH TYNDEP. Ka kyntien SHOH TYNDEP, ka wan na ka kyntien Khaw Tyndep, u khaw uba ki pyndonkam ki nongri thlen.
Une u Khaw Tyndep uba long byrstem, ha kaba la pynshong ha une u khaw ia ka bor Tyndep, ban pynshoh bieit ia ki briew, haduh ba kim tip briew shuh, bad kumta u men shoh noh u suk ban shu kem beit ia kum kita kiba la shah bret da u Khaw Tyndep. Hynrei lah ban ialeh pyrshah ia kane, ba mar ia sngewthuh ba la shah bet ha u Khaw Tyndep, mar mar dei bam bad kbum ia ka dew met ha shyntur. Lada don kiba ju rah khaw ha pla, kata u khaw uba na ïing, kaba ki ong u Khaw Lawai ne u Khaw Sohpetbneng, dei ban bam mar mar, bad kumta hi u Khaw Tyndep u duh noh ia ka bor pynshoh bieit pynshoh jadu ka jong u. Ha baroh ki kam tamasa ne jinglehsngewbha, ha ka rong ka taw, ki da don ki nongpyniaid khnang ban don ka jingpyniaid beit bad ryntih.
Ia kum kine ki nongpyniaid, ha ki kyntien Phareng ki ong MASTER OF CEREMONIES, bad ha ka kyntien Khasi pat, ngi ong ki DAMDAR.Kumta ki DAMDAR ki bun kam khamtam ha ki por ka shad ka kmen, hapoh shnong hapoh thaw. Kumta ha kum kine ki por, ki don ruh ki nongtem ksing tem bom, ki nongtem ia ki ksing thap, ka ksing kynthei, ka Shalamen lane ka shaw shaw, bad ruh ki nongput Tangmuri, kaba long ka jingput ba thiang tam, ka Tangmuri ka syiem jong ki jingput ki jingtem Khasi. Ha ka kyntien Phareng ia kinee ki nongput ki nongtem, ki ong ki MUSICIANS. Ha ka kyntien pat ki ong ki DHULIA lane ki TANGNOH KI TANGBOIT. Kano kano ka kynja nar kaba khring bad kaba bat thrait, ka kyntien Phareng ki ong MAGNET. Ha ka kyntien Khasi kano kano kaba snoh ne bit sbak, bad shitom ban pyllait ki ong BIT NOH. Na ka bynta kino kino ki jingialeh ne ki jing-iakhun, khamtam ha ki jingialehkai, ki nongjop ki ioh, ha ka kyntien Phareng ki ong MEDAL.
Ha ka kyntien Khasi ka mut ba ki ioh TAKMA. Kum ka takma ksiar, takma rupa, takma tama. Khnang ban jop bad ïai ne ha kano kano ka jingialeh, la ju buh ia ki kyntien ban ai mynsiem, ia kata ha ka kyntien Phareng ka dei ka MOTTO, kaba mut KYRMIT ha ka kyntien Khasi. MEASURE, ha ka kyntien Phareng, ka mut kaba THEW BA WOH, khamtam haba thew da ka tarajur ne pyrla. Haba thew ia ka lynter ne pyngkiang ju thew da u pita, ne kaba ong ruh thew DIENGDANG, khamtam ia ki jaka ki puta. MEETING ha ka kyntien Phareng, ka mut ka jingialang, ne jingiasyllok ne ka kynja dorbar sorbar. Ha ka kyntien Khasi ki ong ka MER, kaba mut ka jingialum ialang kaba donkam, jong uba bun uba lang.MINORITY ha ka kyntien Phareng, ka mut U RIT PAID, ha ka kyntien Khasi. Hynrei lah ruh ban ong, U SHI TROH lane U SAN U SHIPHEW.
