Shillong, Ïaïong 05:
U rangïalehkai kriket barim jong ka ri u Sudhir Naik, uba la ïalehkai lai tylli ki jingïalehkai Test ha u snem 1974, u la khlad noh ha Mumbai hospital ha ka Sngi Balang hadien ba ka jingshitom ka la bat ïa u, la pyntikna ka Mumbai Cricket Association.
Une u rangïalehkai barim u la kynjoh sha ka rta kaba 78 snem bad u la ïehnoh shadien ïa ka khun kynthei ka jong u.
Dangshen, u Naik u la kyllon hapoh ka kamra sum bad u la mynsaw ha ki bynta jong ka khlieh bad hadien kane la pynkit ïa u sha jaka sumar ha Mumbai.
“Ka Mumbai Cricket Association ka pynpaw ïa ka jingsngewsih halor ka khlad noh u Sudhir Naik. Ka jingnoh synñiang ka jong u ha ka kam ïalehkai kriket kan ïai sah shirta ha ka jingïalehkai kriket ha Mumbai,” la pynpaw ka MCA ha ka sngi Balang.
U Naik u la mihkhmat ha ka kam ïalehkai kriket na ka bynta ka Mumbai bad dei ha ka por ba long kapten ma u ba katei ka jylla ka la khur ïa ka jingjop ha ka Ranji Trophy ha ka aïom ïalehkai 1970-71.
Ka jinglong nongïalam u Naik ka la pynlong ïa ka Mumbai ban khur jingjop ha ka Ranji Trophy ha katei ka aïom khlem ka jingïadon lang ki khlur ïalehkai kum u Sunil Gavaskar, Ajit Wadekar, Dilip Sardesai bad u Ashok Mankad.
Ha ka Ranji jong u snem 1972, u Naik u la shah weng noh na ka kynhun ïalehkai (XI) kum u nongtied ba kynsai.
Ha u snem 1974, u la ïoh ka lad ban leit sha England bad u la ïoh ïa ka lad ban mihkhmat ha ka sien kaba nyngkong eh ha ka jingïalehkai Test na ka bynta ka ri India ha Birmingham bad u la lah ban tied ïa ka shiteng spah run kaba 77 ha ka inning kaba ar shwa ban mad ïa ka jingshah rem.
U la ïoh ruh ka lad ban ïalehkai haduh 85 sien bad u la kamai kumba 4500 run (4376) kynthup ïa ki jingioh ban khyrwit ïa ki spah run.
U la bat ruh ïa ka kam kum u shongknor jong ka Mumbai Selection Committee bad ha ki snem kiba hadien u long kum u nongsumar ïa ka madan ïalehkai ha Wankhede Stadium khlem da donkam bainong.
