Shillong, Ïaïong 05:
U kyrtong ka National People’s Party (NPP) na Sohïong konstitwensi Bah Samlin Malngiang, u la ong ha kine ki ilekshon ba dang shu dep ki don ki seng saiñ pyrthei kiba la beiñ la khoh ïa ka seng NPP, hynrei mar shu thep ka jingñiew vote mynta pat ki la wan sdien sha ka seng NPP tang ban donlang ha ka sorkar.
Ïa kine ki kyntien u Bah Samlin u la kren ha ka jingïalang pynskhem ïa ki nongkitkam ka NPP Women’s Wing Sohïong Block kaba la long ha ka Sngi Balang ha shlem treikam ka seng ha Sohïong.
Ha kane ka sngi ka Kong P. Nongpluh kaba dei ka President ka NPP Meghalaya State Women’s Wing ka la pynskhem ia ki nongkitkam ha ka jingïadonlang u kyrtong ka NPP na Sohïong, Bah Samlin Malngiang, u MDC ka Sohïong-Nongspung, Bah Sherborlang Mawlong, Bah Bajop Pyngrope, MDC ka Rambrai Jyrngam, Bah Kitbok Nongrem uba dei u President ki samla ka NPP Meghalaya ryngkat palat spah ngut ki longkmie kiba la wan na ki shnong bapher bapher jong katei ka konstitwensi.
U Bah Samlin u la ong biang ba ki paidbah ha Sohïong mynta ki la sngewthuh ba kim kwah shuh ban phah da ki ‘agent’, hynrei kin jied beit da u kyrtong ka NPP kaba dei ka seng kaba bat ïa ka bor synshar ha ka sorkar jylla.
Nangta u la ïathuh naduh ba u jop ïa ka ilekshon MLA na ka seng HSPDP, ki paidbah ki khlem leit pan tin sop ïing ne ki skhim na u Sing, hynrei ki wan pan na u. Kumjuh ruh lada u jop mynta ha kane ka ilekshon ki paidbah kin nym leit pan jingïarap na ka kot, hynrei kin pan da u hi.
Kumta u la ong ba ka jingjied ïa ka seng NPP namar u donkam ïa ka seng kaba lah ban synshar ïa ka jylla kaba kham bun ki MLA, namar lada u don ha ka seng kaba rit ka shem jingeh ïa u ban wanrah ki kam pynroi hapoh ka konstitwensi.
Shuh shuh u Bah Samlin u la ong ka UDP ka dang jop tang shisien ha Sohïong konstitwensi kata tang ha u snem 1998 naduh ba seng ïa ka, hynrei hadien ba la wan biang ka ilekshon kam ju jop shuh.
U la kyntu ïa ki longkmie ba kin long kiba trei shitom ban pynshai ha man ki shnong khnang ban pynkhlaiñ shuh shuh ïa ka seng NPP nangne shakhmat.
Kum ban shu kdew ka ilekshon ban jied ïa u MLA ba thymmai jong ka Sohïong konstitwensi kan long ha ka 10 tarik Jymmang, 2023 bad ka jingñiew ïa ka vote kan long ha ka 13 tarik Jymmang, 2023.
Ka jingpynlong ïa ka ilekshon ha Sohïong ha u bnai Jymmang mynta u snem ka dei ka jingkhlad noh u Bah HDR Lyngdoh ha ka 20 tarik Rymphang, 2023, kata shi taïew shwa ba ki paidbah kin leit ban thep vote ha ka 27 tarik Rymphang kaba dei ka ilekshon ban jied ïa ki nongthaw aiñ hapoh ka jylla.
